Semo ne'ebé previstu entre Lisboa
ho Díli, adia ba loron 19 Setembru, sei tula estudante timoroan sira ne'ebé iha
nasaun oioin no hakarak fila ba uma, hatete hosi fonte hosi Ministériu Negósiu
Estranjeiru Timor-Leste nian ba Lusa.
Juvêncio de Jesus Martins,
diretor ba Asuntu Konsular ho Protokolar sira, esplika ona ba Lusa katak kuaze
ema timoroan na'in 120 ne'ebé agora daudaun iha Brazil, Kuba, Reinu Unidu,
Itália ho Portugal sei halo viajen ba Lusa hodi bele tuir iha semo ne'ebé sei
halo hosi EuroAtlántiku.
"Lista ikus prepara hela
hosi Embaixada Timor-Leste iha Portugal, ne'ebé ikusmai sei haruka mai iha
ne'e, hodi nune'e ami bele kordena ho Saúde ho Imigrasaun, inklui iha tema sira
kuarentena nian", nia refere.
Inkluzaun hosi estudante sira iha
semo halo adiamentu daruak iha loron previstu hodi sai hosi Lisboa, ne'ebé ba
dala uluk marka ba loron 06 Setembru, adia ba loron 17 no agora adia ba loron
rua tan.
Kestaun ida ne'ebé maka hamosu
preokupasaun balun hosi família sira hosi estudante sira, ne'ebé tenki selu
viajen, folin hosi billete sira, hamutuk euro 1.980 hodi ba de'it Timor-Leste.
"Ema balun dezisti ona tanba
ne'e", nia refere.
Kestaun hosi folin ne'e ko'alia
iha loron-kinta ne'e hosi deputadu sira iha Parlamentu Nasional ne'ebé ohin
halo debate kona-ba renovasaun hosi estadu emerjénsia.
Antonio Verdeal, hosi Kmanek
Haburas Unidade Nacional Timor Oan (KHUNTO), partidu ida hosi Governu, aponta
ona ezemplu hosi estudante sira ne'ebé tenki halo viajen hosi Kuba, ne'ebé nia
folin viajen to'o iha Díli bele to'o dolar 3.500 (euro 2.960).
"Governu tenki fó atensaun
ba kestaun ne'e. Família sira tenki husu osan ba billete sira. Governu tenki
apoia ho fó fali osan ba família sira", nia afirma.
Semo komersial, ne'ebé nia
objetivu lori profesor sira ho sidadaun portugés sira ho ema timoroan sira ba
Timor-Leste ho hasai sidadaun portugés sira ho nasionalidade sira seluk hosi
nasaun ne'e, sujere hosi EuroAtlantic rasik, hodi hatán ba preokupasaun ho
falta hosi ligasaun komersial regular sira, ne'ebé suspende lahó tempu definidu
dezde final Marsu.
Semo sei permiti regresu hosi
profesor sira hosi Eskola Portugeza Díli nian ho projetu hosi eskola sira CAFE
(Sentru sira Aprendizajen ho Formasaun Eskolar) ne'ebé sai iha inísiu Abril no
ne'ebé maka seidauk bele fila.
Maski lista final sira seidauk
hakotu, entre Lisboa ho Díli sei halo viajen profesor limanulu resin hosi cAFE
no profesor ho akompañante na'in 58 hosi Eskola Portugeza (inklui dosente foun
na'in 10 ne'ebé sei estreia iha Díli).
Sei halo mós viajen entre Lisboa
ho Díli pasajeiru na'in limanulu resin.
Iha sentidu kontráriu, iha semo
entre Díli ho Lisboa, previstu ba loron 21 Setembru, sei halo viajen ema
timoroan na'in 50 resin, maioria estudante sira ne'ebé sei ba Portugal ho
nasaun sira seluk, no ema na'in sanulu resin seluk, maioria portugés.
Semo ne'e permiti ultrapasa
limitasaun sira ne'ebé ezisti nafatin iha Timor-Leste ho kondisiona maka'as
motivasaun sira hosi no ba illa, ho autoridade aviasaun sira mantén lahó tempu
definidu bandu hodi hala'o semo komersial regular sira ka 'charter sira'.
Agora daudaun halo de'it semo
sira hosi Austrália, liuhosi akordu ida ho AirNorth - ne'ebé limitadu de'it ba
sidadaun australianu sira - no semo ida kinzenal hosi Programa Alimentar
Mundial (PAM) ho asesu limitadu ba funsionáriu sira hosi embaixada sira ho
misaun internasional sira, kolaborador sira ho membru sira hosi ajénsia ONU
nian. Situasaun ida ne'ebé laiha posibilidade ba sidadaun sira seluk, timoroan
sira no mós estranjeiru sira, hodi tama ka sai hosi nasaun, izoladu dezde
Marsu.
Timor-Leste laiha kazu ativu sira
entre 15 Maiu ho 04 Agostu, no agora daudaun iha kazu ativu rua.
Pandemia COVID-19 halo ona
pelumenus ema na'in 857.824 mate ho infeta one ema millaun 25,8 iha nasaun ho
teritóriu hamutuk 196, haktuir balansu ida ne'ebé halo hosi ajénsia franseza AFP.
Sapo TL | Lusa
Sem comentários:
Enviar um comentário