ESPLORASAUN KITAN SEI HOTU

Primeiru Ministru (PM ) Rui Maria de Rui Araújo informa katak,   prosesu esplorasaun mina matan Kitan nian besik hotu ona, maibe Bayu Undang nian sei esplora hela.

“Kitan ninian prosesu esplorasaun besik atu hotu ona, Bayu undang nian oras ne’e sei kotinua,” esplika PM Rui Maria de Rui Araújo ba Jornalista hafoin hasoru malu ho Presidente Republika (PR) Taur Matan Ruak iha Palacio Presidensia, Tersa (22/9.2015).

PM Rui Maria deAraujo dehan, ninia pontu mais altu produsaun ninian ultrapasa tiha ona   iha 2011-2012,, agora dadauk sei produs nafatin maibe ho kuantidade ne’ebe hanesan tinan rua ka tolu liu ba.

Projesaun husi kompanhas nomos tekniku ne’ebe mak servisu iha area mina kampu bayu undang nian seidauk 2022.

“Ida ne’e hanesan mos ho previjaun ne’ebe mak   uluk   ita hahu esplora,   iha 2005 hetan   tiha ona privizaun katak, kampu Bayu undang sei to 2020 to 2022,”dehan PM Rui.

Ho bayu undang ne’ebe mak sei hotu, PM Rui hateten, la fo impaktu ba orsamentu geral Estadu, maibe ba sustentavilidade fiscal.

“Orsamentu Jeral Estadu ita nian 90% dependente ba fundu mina rai, wainhira husi esplorasaun reseitas gas ho oliu nian ne’e komesa redus signifika katak, osan ne’ebe mak tama ba fundu petroliferu komesa menus, ne’e signifika fundu mina rai ne’ebe mak iha la sufisente atu responde ba ita nesesidade orsamentu nian tomak, entaun   ita presiza foti medidas de kompensaun redusaun despejas hodi nun’e   ita orsamental bele nafatin sustetabel ba oin,” tenik PM Rui.

Kongratula Australia

Governu Timor Leste kongratula Primeiru Ministru foun Malcolm Bligh Trumbull ne’ebe mak lidera hikas Governu Australia hodi troka Tony Aboot.

“Lori Governu nia naran hato kongratulasaun ba PM foun Australia ninian I depois hato mos konvite para bele mai vizita Timor Leste,” hateten PM Rui.

Kona-ba negosisaun fronteira tasi ho Governu Australia,   PM Rui hateten, faze de kontaktu kontinua lao hela.

“Ita nia kontaktu lao hela depois mak ita hare, tanba negosisaun ne’e laos buat ida ita obriga malu, ita presiza abertu ba desponivelidade husi fatin rua hotu, Timor Leste disponivel atu hahu halao negosiasosin kona-ba fronteira maritima, ita hein resposta,” haklaken PM Rui.

Durante enkontru ho PR Taur Matan Ruak, PM Rui informa mos nia vizita ba iha Nova Yorke   hodi partisipa iha Asembleia Geral Nasoins Unidas nomos nia vizita trabalho iha Cuba. Dislokasaun PM Rui ba Nova Yorke ne’e iha Tersa (22/9/2015) ho nia ekipa hanesan mos Media sira seluk tan. avi

Jornal Nacional