HORTA: GOVERNU TENKI REALISTA

DILI - Eis Prezidente Repúblika, José Ramos Horta, subliña, governu tenki realista hodi deskuti no hadi’a tratadu Certain Maritime Agriment Timor Sea (CMATS) kona-ba fronteira marítima ne’ebé la favorese ba Timor-Leste.

Tuir Horta, maske Timor-Leste ho Austrália  negosia ona fronteira maritíma maibé  sei lori tinan naruk, tanba nia fó ezemplu negosiasaun fronteira rai maran ho Indonézia rezolve iha tinan 10 resin nia laran ona maibé  sei hela pontu balun seidauk rezolve, kuantu mais fronteira tasi entre Timor-Leste ho Austrália. Tanba ne’e, tenki realista hodi hadi’a uluk akordu CMATS.

“Tenki mós realista haree tratadu aktual ne’e oinsá  mak atu hadi’a i bainhira la’o dadauk ho fronteira maritíma oinsá  mak hadi’ak,” Horta ba jornalista sira hafoin partisipa semináriu kona-ba direitu umanitáriu ne’ebé organiza hosi Cruz Vermeilha Internasional, iha MNEK, Praia dos Coqueirus-Dili, Segunda (21/09).

“Ha’u la preparadu atu ko’alia tanba iha membru Konsellu Marítima  i iha porta vos, maibé  ha’u hatete, governu nia pozisaun ne’ebé ha’u rona, governu kontinua prontu, matan loke para halo diálogu  ho Austrália,” hatutan Premiadu Novel ba Paz ne’e.

Tuir nia, sei iha tempu  para Autsrália  muda nia hanoin no polítika  sobre tratadu kazu CMATS nian.

Relasiona ho Primeiu Ministru Autsrália  foun, Malcolm Turnbull nia liderasa, Horta subliña, Timor-Leste presiza fó lai oportunidade hodi PM foun bele hanoin no muda polítika para halo diálogu, deskuti fronteira marítima.

“Primeiru Ministru ida uluk, ulun fatuk toos ne’e, Aboot monu tiha ona, sei fó lai oportunidade para ministru foun ne’e halo diálogu  ka lae, maibé  tinan foun mai iha eleisaun iha Austrália  i ne’eduni ita haree sei iha oportunidade para Austrália  muda nia hanoin hahú halo negosiasaun ba fronteira marítima,” dehan Horta.

Timor-Leste kontinua prepara hodi halo diálogu ho Autsrália oinsá  mak deskuti ona fronteira marítima, maibé  Austrália  sei hatudu reasaun negativu.(dgx)

Timor Post