ESTADU TENKI VALORIZA LUTA IHA 1999

DILI - Komunidade sira iha kapital Dili husu ba Estadu no governu atu valoriza mós joven no ema sira ne’ebé mak luta ho fó votus iha tinan 1999 nian, tanba liu hosi loron ne’e mak TL hetan nia ukun rasik a’an.

Venancio Coreia (40) nu’udar Komunidade Fuslam dehan, estadu keta haluha joven no Timor-oan sira ne’ebé mak kontribui maka’as ba ukun a’an nian liu-liu sira ne’ebé mak fó a’an tomak iha tinan 1999 nian tanba tinan ne’e na’udar tinan determinasaun ba luta durante tinan 24 nia laran.

“Ami ne’ebé mak nu’udar joven iha sidade Dili momentu tinan 1999 ne’e hasoru mós situasaun ida ne’ebé mak defisil tanba ne’e mak ami husu ba estadu ho governu valoriza mós juventude no ferik katuas ne’ebé mak fo nia a’an tomak liu hosi nia votu iha tinan 1999 hodi ita hetan ukun rasik an,” dehan Venancio ba Timor Post, iha nia hela fatin, Bairro-Pite, Sábadu (29/08).

Iha fatin seluk Domingos da Costa (52) komunidade Taibessi informa, estadu la bele valoriza de’it mak veteranus.

Tuir nia, loron konsulta popular 30 de Agostu hanesan loron ne’ebé determina independénsia.

 Tanba ne’e, Nia fó hanoin ba estadu presiza tau atensaun mós ba ema sira ne’ebé mak uluk fo nia votus no se hirus matan ba Indonézia iha vila laran ne’e sira balun to’o oras ne’e nein hetan buat ida hosi governu.

“Ami la husu buat barak importante mak rekoñesementu agora ne’e veteranus sira mak naran bo’ot liu maibé uluk mak ita la vota mós oras ne’e seidauk ukun a’an ne’ebé presiza valoriza malu,” dehan Domingos.

Entertantu, Rogeiro Soares (65) komunidade Komoro  ejize ba estadu tenke rekoñese mós kontribuisaun ne’ebé kontribui iha tinan 1999, tanba loron ne’e deside independénsia.

 “Ha’u husu ba estadu atu la bele haree de’it balun, maibé haluha tiha balun ita hotu uluk hodi pregu mak duni Indonézia, maske ita hotu hatene antes to’o iha votasaun liu ona prosesu lubuk ida, maibé agora estadu haree de’it balun mak di’ak liu ne’e halo nusa ami tenki koalia ga,” dehan nia iha komoro.

Liu hosi loron konsulta popular tama ona tinan 16, ejize ba estadu no governu atu la bele haluha mós luta na’in sira iha vila, liu-liu sira ne’ebé mak vota iha Tinan 1999, no balun mate iha mós tinan ne’e bainhira rona rezultadu Timor manan eleisaun.(Way)   

Timor Post