POVU SEIDAUK PRIENSE KRITERIA, LORON IDA HAN DALA TOLU

DILI - Primeira Dama (PD), Isabel Ferreira rekoñese Timor-Leste ukun a’an tinan sanulu resin ona, maibé povu Maubere seidauk priense criteria, loron ida han dala tolu. 

Tanba kriteria loron ida han dala tolu sei do’ok hosi povu, governu rasik mós laiha dadus kona-ba povu sira ne’ebé durante ne’e terus ba hamlaha.

“Hanesan orgullu ida ba ita kuandu ita nia povu moris iha fatin ida mahon, la sente loron no udan kona sira, han loron ida dala tolu, entaun ida ne’e mak sai hanesan ita bele dehan katak ita kontente ona, maibé ne’e sei do’ok,” Primeira Dama, Isabel Ferreira informa ba jornalista sira iha edifísiu BCTL, Acait, (28/08).

Maske nune’e, Primeira Dama  afirma, dezenvolvimentu Timor-Leste nian la’o hela, tanba ne’e maka’as dezenvolvimentu la’o maka’as maibé seiauk to’o, presiza servisu maka’as liu tan oinsá mak povu bele hetan moris di’ak tuir mehi saudozu sira nian.

“Ita bele dehan prosesu dezemvolvimentu la’o maka’as, entermus de infra-estrutura ita haree di’ak maibé ita labele kontente de’it ho ida ne’e maibé iha buat barak ne’ebé mak ita presiza haree liu-liu família kbi’it la’ek sira,”katak nia.

Primeira Dama hatutan, iha tinan 10 resin nia laran maka’as dezenvolvimentu la’o maka’as intermus infra-estrutura maibé presiza tau matan liu-liu ba família kbi’it la’ek sira hodi nune’e família.

Maski ki’ak maibé sira bele moris iha fatin ne’ebé dignu hanesan povu iha Timor-Leste.

Maske nune’e Primeira Dama hateten iha tinan 10 resin de’it ne’e labele halo ema hotu muda nia moris maibé labele uza razaun ne’e para hosi povu kontinua ki’ak nafatin.

Tanba ne’e inan nasaun hateten estadu sei halo esforsu tomak hodi dezenvolve povu nia moris liu-liu apoiu no atividae oi-oin, maibé presiza apoiu mós hosi povu rasik no servisu maka’as oinsá mak hadi’ak no dezenvola a’an no família uma laran.

Nasaun ida orgullu ho dezenvolvimentu, bainhira povu hetan moris di’ak tanba sasukat ne’e mai hosi povu.(dgx)

Timor Post