SIK Investiga Sidadaun Indonesia 58 Tama Ilegal Mai TL

DILI - Polisia Nasional Timor Leste (PNTL), halo hela investigasaun ba sidadaun Indonesia nain 58 neebe foin dadauk tama ilegal mai TL ho Roo 4, no hetan kapturasaun hosi Forsa Naval iha area Hera.

Tuir Komandante Jeral PNTL, Komisariu Julio da Costa Hornay katak sidadaun estranjeiru nain 58 hamotuk ho roo 4 neebe maka foin dadauk kaptura hosi forsa Naval nee, intrega ona mai iha Servisu Investigasaun criminal (SIK) hodi halo investigasaun.

Hau hanoin prosesu investigasaun ba ema nain 58 no roo hat neebe maka tama ilegal mai iha area ita nian, no kaju nee hau rasik mos halo hela monitorin, maibe parte SIK nian dehan sei iha hela prosesu investigasaun nia laran,no sira nain hat neebe maka sai kapitaun ba roo 4 nee iha ona embaxada Indonesia nia liman, no sira nain 54 seluk nee iha hela Roo leten tasi laran,” informa Komisariu Julio ba Jornalista sira, Segunda (31/08/2015) iha edifisiu Ministeriu Interior Caicoli Dili.

Nia informa liu tan katak, kapitaun nain haat nee haruka ba ona iha embaxada Indonesia hodi hein prosesu investigasaun, tamba sa maka sira tama illegal.

Iha parte seluk Komandante Interino Operasaun Investigasaun krimanal, Inspektur Xefi  Mozinho Corea hateten, prosesu ba sidadaun Indonesia nain 58 neebe tama ilegal mai rai laran ho Roo 4 nee lao hela no SIK mos simu ona orientasaun hosi Ministeriu Publiku atu aplika Tir no konstrui ba arguidu. Informasaun kompletu iha STL Jornal no STL Web, edisaun Tersa (1/9/2015). Madalena Horta

Suara Timor Lorosae