FRETILIN PRONTU DEBATE, ALTERA LEI PENSAUN VITALISIA

Vise Xefi bankada Partidu FRETILIN, Josefa Álvares P. Soares hateten katak, bankada FRETILIN atu diskuti lei pensaun vitalísia no halo revizaun, wainhira meza bele ajenda hikas fali lei ne’e.

Deputada Josefa Soares hatutan katak, ba povu ninia halerik FRETILIN sempre prontu atu debate hodi halo alterasaun ba lei pensaun vitalisia, maibe depende ba iha meza mak atu ajenda lei ida ne’e.

“Iha reuniaun entre bankada mós ami husu bei-beik ona, atu oinsa bele haree lalais konaba lei pensaun vitalísia, tamba lei ne’e agora partidu balun hato’o dehan sira mak hato’o ona. Maibé uluk iha segundu lejislatura partidu FRETILIN mak hato’o uluk ona ninia projetu de lei ida ne’e atu halo revizaun, mas ema ida lahanoin hetan para atu ajenda lei ne’e atu halo diskusaun. Foin dadaun ne’e partidu hotu-hotu buka atu halo konsensus ida para atu bele haree halo revizaun ba lei ne’e, maibé na realidade seidauk ida”, informa deputada Josefa Soares ba Jornalista sira iha PN, Tersa (15/9).

“Hau espera katak kuarta sesaun lejislativa ida ne’e ami partidu FRETILIN ohin husu koalia ona hakarak katak parlamentu ida ne’e atu dinámiku liu iha ninia servisu, labele hakmatek hela ho nia servisu, maibé bele haree tok lei estruturante ne’ebé atu bele servi povu ida ne’e hala’o ona, ita labele nonok hela deit hanesan ne’e lalos,” nia hateten.

Deputada Josefa hateten katak, konaba regalias ho saláriu pokok ne’e tenki diskuti halo didi’ak, tamba buat sira ne’e iha ona ninia vantajen no dezvantajen.

“Ita bele haree tok regalias sira ne’e ho ninia saláriu pokok, ha’u hanoin importante mak ne’e tempu de partisipasaun no haree iha subsídiu kuantidade ne’e atu oinsa reduz ka oinsa. Sé karik dehan katak atu reduz ne’e oinsa, tenki haree korela ho ema nia tempu de partisipasaun ka atu haree oinsa los ida ne’e só iha diskusaun mak ita bele koalia buat ida. Ha’u labele koalia uluk, tanba horsida iha diskusaun sai fali oin seluk,”deputada Josefa ne’e hateten.

Nia hatutan tan katak, subsídiu pensaun vitalísia ne’e ate agora, eis deputadu sira ho eis membru Governu lasimu osan ne’e kompletu ida, sira simu apenas saláriu baze ne’e deit.

“Ita tenki haree didi’ak, la’os dehan sira simu kompletu, sira lasimu kompletu sira simu saláriu pokok, depos i husi salariu pokok ne’e kua tiha tan $ 500,000 ba selu tasa ba Estadu, ne’ebé ita tenki haree buat ne’e atu tetu didi’ak atu oinsa, depois buat ida ne’e atu hotu ba iha sesaun lejislatura ida ne’e ka sei kontinua ka oinsa. Sé kontinua forma atu kontinua ne’e oinsa, reduz ka la reduz, seé reduz karik reduz ne’e korela ho saida. Ida ne’e ami presiza iha diskusaun ida klean para bele koalia konaba ida ne’e,”nia hateten.

Iha fatin hanesan membru Parlamentu Nasionál husi bankada CNRT, Cesar Valente hateten katak, lalika tan tinan atus ida, maibé tinan 10-20 mai oin tan deputadu hira mak aumenta, membru Governante sira hira mak aumenta pensaun vitalisia ne’e hira mak aumenta ne’e todan teb-tebes ba Orsamentu Jeral Estadu.eni

Jornal Nacional