Komandu PNTL Sai Mediador Kazu Faterlau No Fatukalu

DILI,  (ANTIL) - Komandu Poilísia Nasionál Timor-Leste (PNTL) hamutuk ho autoridade lokal halo mediasaun ba kazu asalta malu ne’ebé akontese entre populasaun suku Faterlau Munisipiu Aileu ho suku Fatukalu Munisipiu Manufahi.

Tuir nota komunikadu ne’ebé mak ANTIL asesu, haktuir, iha loron 18 Agostu 2016 liu ba populasaun hosi suku Faterlau postu administrativu Lekidoe Munisipiu Aileu no populasaun suku Fatukalu, postu administrativu Turiskai, Munisipiu Manufahi, hamutuk autoridade lokal, Komandu PNTL Munsipiu Aileu, halo dialogu hodi rona lamentasaun ne’ebé  mak populasaun suku rua infrenta,  durante tinan 2009 to’o tinan 2016.

Iha mediasaun ne’e, komunidade sira hamutuk halo tuir lisan kultura  iha mota Aimea, ne’ebé  sai baliza entre suku rua ne’e, nahe biti bo’ot no oho animal hodi kasu tuir lisan.

Populasaun hosi suku rua, desde tinan 2009 to’o tinan 2016 labele halo movimentu ba malu, tanba problema ne’ebé  maka mosu hodi difikulta sira atu hakat liu mota Aimea, ne’ebé  sai baliza entre Munisipiu Aileu ho Same.

No wainhira Prezidente Repúblika (PR) halo vizita ba suku rua ne’e, komunidade sira aprezenta lamentasaun ne’ebé  sira hasoru durante ne’e, tanba labele hakat liu baliza iha mota Aimea. Nune’e, PR husu ba administrador Munisipiu Aileu no Same, atu buka dalan  rezolve problema ne’e.

Komandante PNTL Munisipiu Aileu, Superintendente Damião da Silva Correia hateten,  Komandu hamutuk ho Ofisial Polísia Suku (OPS) no autoridade lokal, fasilita parte rua hetan solusaun ba problema ne’e, nune’e iha futuru labele mosu tan problema hanesan.

Durante tinan 2009 to’o mai 2016,  komunidade hosi Munisipiu Aileu ho Munisipiu Manufahi  odi malu, na’ok sasan, hana malu.

Iha fatin hanesan, Administrador Munisipiu Aileu, João Tilman do Rego esklarese,  iha momentu halo mediasaun ho suku rua ne’e, establese mós akordu kultural ne’ebé  kesi komunidade parte rua atu labele hamosu problema hanesan iha futuru.

“Akordu  komunidade suku Fatukalu no suku Faturlau  iha mota Aimea, hanesan  akordu Kultural ne’ebé  tuir uju kustume Munisipiu AIleu,  espesilmente aplika iha suku rua. Objetivu,  kria kooperasaun, koordenasaun entre komunidade sira iha Munisipiu rua ne’e”, administrador Munisipiu Aileu hateten.

João Tilman do Rego reafirma, ho mediasaun no akordu Kultural ne’e maka komunidade sira hosi Munisipiu rua bele moris hakmatek no bele  haforsa nafatin koopersaun entre komunidade suku Faturlau no suku Fatukalu. (jornalista : Manuel Pinto/Editór: Otelio Ote)

LEE MOS ANTIL