sexta-feira, 30 de setembro de 2016

Númeru Ki’ak Tun, Setór Produtivu Kontinua Abandonadu


DILI, (ANTIL) – Deputadu Francisco Branco observa, maske relatoriu bar-barak hatudu katak Timor iha tinan hira ikus ne’e iha redusaun ba númeru ki’ak, maibé realidade moris Timor ne’ebé labele nega mak setór produtivu sei abandonadu.

“Realidade ida ne’e governu presiza buka hatene kauza fundamentál tanbasá povu abandona setór produtivu importante hanesan agrikultura, hodi lori jovem halo migrasaun mai área urbana, husik katuas ferik sira mesak servisu iha natar no to’os ho produsaun ne’ebé minimu ba beibeik,” Francisco Branco tatoli ba ANTIL foin lalais ne’e iha Parlamentu Nasionál.

Francisco Branco dehan, mudansa iha moris povu nian. simples de’it, ezemplu uma mutin barak mak harii iha fatin hotu, motorizada iha ne’ebé de’it, karik iha festa ruma bele haree laiha diferensa ema nia hatais área rurál ho área urbana, maibé  iha parte seluk setór agrikultura sei menus kompara ho tempu uluk.

Nune’e Francisco Branco sujere atu governu labele konsentra dezenvolvimentu iha sidade, liuliu iha kapitál Dili, maibé tempu ona atu deskonsentra dezenvolvimentu ba fatin seluk. Polítika deskonsentra tuir Branco bele atrai populasaun ba fali iha sidade nune’e, bele hamamuk sidade sira iha kapitál.

Aliende dezenvolvimentu ne’ebé mak konsentra iha sidade halo ema abandona sira nia rain, konsekuénsia seluk polítika subsidiu oi-oin ne’ebé estadu Timor Leste adopta hodi fó ba sidadaun sira mak kontra produtividade.

“Polítika subsidiu ne’e di’ak ba tempu ida, maibé karik kontra produtivu ba tempu naruk”, Francisco Branco kurizi.

Antes ne’e governu liuhosi Ministériu Finansas lansa rezultadu peskiza datoluk ne’ebé ministériu kopera ho Bank Mundial hatudu, númeru ki’ak Timor-Leste entre tinan 2007 no 2014 iha redusaun maka’as.

Tinan 2007 totál ki’ak pursentu 47,2 tinan 2014 tun ba pursentu 30,3, haree ba mudansa ne’e Timor konsege halo redusaun númeru ki’ak pursentu 2,4 hosi pursentu 47,2 tun ba pursentu 30,3. (jornalista: Manuel Pinto; editora: Rita Almeida)

Foto: Francisco Branco

Sem comentários: