Besik Natal, Check Point Hahú Intensivu

Ida ne’e mak transporte públiku hirak ne’ebé Polisia Tranzitu Munisipiu Dili prende iha operasaun ne’ebé hala’o iha Kinta (15/12). Imajen ne’e olatimornews.com asesu husi pajina facebook Komandante PNTL Munisipiu Dili, Pedro Belo.

DILI: Loron boot Natal no Tinan Foun besik daudauk ona, babain iha loron boot sempre akontese asidente trafiku no dezastre. Atu bele minimiza ida ne’e, Polisia Tranzitu Munisipiu Dili hahú halo check point ho intensivu.

Hafoin iha Kuarta (14/12) halo check point ba kareta riben metan no uza sticker, iha Kinta (15/12), Polisia Tranzitu kontinua hala’o operasaun iha Kapital Dili. Iha operasaun ne’ebé hala’o iha estadiun munisipal Dili nia oin ne’e, Unidade Tranzitu konsege prende mikrolet 28 no motor ida.

"Razaun primeiru mak ita halo check point ne’e tanba kondutór sira ne’e balun la uza farda no kondutór balun seluk nia sim la tuir kategoria", dehan Komandante Tranzitu Munisipiu Dili, Inspetór Matias da Silva ba olatimornews.com.

Iha oportunidade ne’e nia dehan operasaun sira ne’e sei kontinua iha kualker tempu no sei hala’o iha fatin ne’ebé de’it iha Kapital Dili.

“Operasaun ne’e mós sei hala’o kuaze iha jalur mikrolet sira hotu hodi check dokumentus no karta kondusaun,” dehan Matias.

Aleinde ba transporte públiku, nia dehan, polisia tranzitu mós kontinua halo operasaun ba kareta estadu ne’ebé hala’o atividade fora oras serbisu. (*)

Pachar Malay – Ola Timor - Editór: Tellukoro

Lee mós iha Ola Timor: Polisia Prende Kareta Riben Metan no Uza Sticker