PJR – SIK Destroi Droga 3,99kg Iha Likisa

DILI, (ANTIL)—Prokuradória Jerál Repúblika (PJR) hamutuk ho Polísia Servisu Investigasaun Kriminál (PSIK), Sesta (16/12)  destroi aimoruk droga ho tipu sabu-sabu ho totalidade 3,99kg iha Kaitehu, Likisa.

Destruisaun bazeia ba norma sira hosi lejislasaun Indonézia sei aplika iha Timor-Leste nu’udar lei subsidariu  hanesan iha artigo 60 no artigo 62 hosi lei no 22/1997 no mós artigu 53 hosi lei 05/1997.

Baze seluk mak pedidu hosi Procurador Lidia Soares, iha data 30/11/2016 destruisaun ba objetu apreendidu  krime trafiku droga iha prosesu tolu hanesan;

Primeiru, NUK: 0147/2014, PNSIC, arguido sira Sriyanti no Nuryadi, objetu apreendidu Droga Sabu-sabu ho todan 2,338 gramas.

Segundu, NUK 0095/2014.PNSIC, arguidu sira Venancio Madeira , Wu Qi Ling, Lim Chia Chay, objetu apreendidu Sabu-Sabu Kristal ho todan 1,718 gramas.

Terseiru, NUK 0147/14.PNSIC, arguido Ikhsan Dermawan, objetu  apreendidu Sabu-Sabu Kristal  ho todan 4,67 gramas.

Prokuradór Jerál Repúblika, José da Costa Ximenes hateten, desde inisiu mandatu, iha prioridade haat importante, inklui kombate kriminalidade organizada, hanesan korupsaun ho droga.

“Ho kooperasaun Polisia Nasionál liuhosi Servisu Investigasaun Kriminal, iha 2014 ita halo operasaun boot tolu, ne’ebé konsege ka’er arguido na’in haat ba iha prosesu tolu,” PGR José da Costa Ximenes informa ba jornalista sira iha Kaiteu, Likisa, Sesta (16/12).

Arguida  Sriyanti no Nuryadi, kaptura iha aero portu Prezidenti Nicolau Lobato, Komoro.Arguido Ikhsan Dermawan, tama liu hosi fronteira Batugade, Mota Ai no to’o Dili mak kaptura nia.

“Arguido nai’n tolu ne’e sidadaun Indonézia, tama iha sindikatu droga, Ne’e rezultadu investigasaun ne’ebé mak ita halo,” José da Costa Ximenes esplika.

Tribunál Timor Leste diside ona arguido na’in rua (Sriyanti, Nuryadi) ho pena hanesan; Sriyanti hetan pena prisaun tinan sanulu resin lima, Nuryadi (tinan 13 no fulan neen) no arguido Ikhsan Dermawan hetan pena prisaun 10.

Sei iha prosesu sanulu resin, ne’ebé oras ne’e sei halo julgamentu iha Tribunál. Entertantu arguido Venancio Madeira Cs, ne’ebé kaptura iha parte Akaderuhun, Dili, Tribunál diside pena prijaun tinan hitu.

“Ha’u hakarak hatete, ida-ne’e pela primeira vez, ita halo distruisaun ba droga sira. Aproveita hodi apela ba maluk timoroan, liu-liu juventude katak droga ne’e ladi’ak ba saúde, phisokolojia no sai problematiku iha sosiedade,” José fó hanoin.

Iha fatin hanesan, Komandante Polísia Investigasaun Kriminál, Ludgerio Lay hateten, ba futuru polísia sei tau-matan nafatin hodi luta kontra droga iha Timor-Leste, nune’e Timor-Leste bele livre hosi droga.  (Jornalista : Manuel Pinto/Editór: Otelio Ote)

Foto: Komandante Ludgerio Lay Sunu hela Aimoruk Droga Sabu-sabu Kristal iha Kaitehu, Likisa.