Roque Rodrigues no Sosiedade Sivíl Presta Omenazen Ba Ativista Rai Lakan

DILI, (ANTIL) – Roque Rodriges, eis Sekretariu Estadu Defeza, Kinta (15/12) iha Yayasan HAK Dili, hamutuk ho organizasaun soseidade sivíl no ativista Timoroan fó omenazen ikus ba ativista George Junus Aditjondro alias “Rai Lakan”, sidadaun Indonezia ne’ebé mate loron 10 Dezembru 2016 iha Óspital Keselamatan, Palu, Sulawesi Sentrál, Indonezia.

Durante nia moris, Rai Lakan dedika no kontribui ba auto determinasaun Timor-Leste ba frente klandestina, iha Indonezia, kolabora liu hosi membru komite ezekutivu Frente Klandestina.

“Ita presiza atu fó omenazen, rekoñesimentu no gratidaun ba Rai Lakan, mezmu nia lahamutuk iha fatin ne’e, nia klamar sei hamutuk nafatin ho ita,” Roque dehan.

Programa ne’e Lakan, hahú ho Missa iha Igreja Motael, Dili, tuku 16.00 kontinua ho memorializasaun iha Salaun Hak Farol,  tuku 19.00 kalan.

Aditjondro “Rai Lakan” nia interese ba Timor-Leste (TL) hahú iha tinan 1974, wainhira nu’udar jornalista ba revista Semanál Tempo. Momentu ne’ebá, hamutuk ho jornalista Indonezia na’in rua seluk,  vizita teritoriu TL dahuluk, hafoin liu tiha revolusaun iha Portugal.

Masakre Santa Kruz 12 Novembru 1991, halo Aditjondro sai militante liu tan iha ninia suporta, liu hosi obras akadémika, servisu advokasia no asisténsia direita ba rezisténsia. Ikusmai fó nia naran funu “Rai Lakan”. Nivél militansia ida-ne’e, nia mantein to’o TL restaura nia independensia iha loron 20 Maiu 2002.

Iha tinan 1993, nia partisipa iha Simpóziu V kona-ba Timor-Leste, ne’ebé hala’o iha iha Universidade do Porto, Portugal. Nia serbisu besik ho ativista timoroan sira, ne’ebé barak maka daudaun ne’e hala’o kna’ar hanesan Ministru iha Governu Konstitusoál VI.

Nia hela tinan barak nia laran iha Australia, iha autoezíliu, kontinua ninia apoiu ba movimentu luta autodeterminasaun Timor-Leste nian.

Iha loron 20 Maiu 2010, Parlamentu Nasionál Timor-Leste fó sai ba públiku kona-ba kontribuisaun husi George Aditjondro, hodi fó ba nia medalla Prinseza Grace do Mónaco.

Aleinde ninia domin ba Timor-Leste, nia mós sai hanesan krítiku ida ne’ebé la hatene kolen ko’alia kona-ba korupsaun iha Indonézia, defensór boot ida ba formasaun komunidade agríkola lokál sira no figura importante ida kona-ba sensibilizasaun ba kestaun sira kona-ba defeza ambiente nian.

Iha fatin hanesan, ativista Renetil, Nuno Rodrige Tchailor hateten, Aditjondro figura ne’ebé influénsia iha Indonezia ba movimentu rezisténsia ne’ebé nia prezensa fo iis ba ativista sira.

Nu’udar apoiante boot no defensór direitu povu TL ba ukun rasik án, Adijondro eroi ida iha rezisténsia Timoroan. Memoria ne’e sei hala’o atu hatudu solidariedade ba família no maluk sira ne’ebé nia husik hela no mós atu selebra ninia moris. (Jornalista: Zezito Silva/Editór: Otelio Ote)