Polisia Bandu Faan Kareta iha Tasi-ibun

DILI: Polisia Tranzitu Munisipiu Dili la autoriza atu ema faan kareta iha tasi-ibun Palasiu Governu no Hotel Novo Turizmo.

Hanesan públiku hatene, durante ne’e faan-na’in balun utuliza area tasi-ibun Palasiu Governu no Hotel Novu Turizmu hodi faan kareta no motor.

"Ohin ami halo operasaun iha kareta no motor sira ne’ebé faan iha Palasiu Governu, besik Kaza Europeia nia oin no Hotel Novo Turismo nia oin, tanba area sira ne’e estadu bandu, labele faan sasan sira iha ne’eba", deklara Komandante Tranjitu Munisipiu Dili, Inspetór Matias da Silva, ba olatimornews.com hafoin hala’o sosializasaun kona-ba kodigu estrada ba estudante sira iha Eskola Canosa, Sabadu (17/12).

Tuir nia, estadu prepara ona fatin iha Tasi-tolu hodi bele uza faan kareta no motor, maibé sira kontinua para no faan iha tasi-ibun.

Prende Taxi 42

Entretantu, Inpetór Matias informa, iha Sesta (16/12), Polisia Tranzitu liu husi ninia operasaun konsege prende taxi hamutuk 42, ne’ebé uza riben no balun karta kondusaun la tuir kategoria.

"Kondutór sira ne’e balun kontra lei kodigu estrada tanba sira balun la uza farda, sira-nia kareta riben metan, no balun nia karta kondusaun la tuir kategoria", nia hatete. (*)

Pachar Malay – Ola Timor - Editór: Tellukoro

Foto: Polisia bandu faan kareta no motor iha tasi-ibun Palasiu Governu no Hotel Novo Turizmo. (FOTO: ilustrasaun)