Trump promete "América dahuluk" iha diskursu inaugural

Donald J. Trump, prezidente EUA nian, hatete iha nia diskursu inaugural katak desizaun ida ne'ebé foti durante nia mandatu "sei halo hodi proteje traballador amerikanu sira no família amerikanu sira".

"Protesaun ne'e sei lori prosperidade maka'as no forsa. Ha'u sei luta ba imi (...) no ha'u nunka deziludi imi. Amérika sei hahú manán fali, manán hanesan nunka akontese. Mai ita lori fali empregu sira. Lori fali ita nia fronteira sira. Lori fali ita nia rikusoin sira. No ita sei lori fali ita nia mehi sira", republikanu ne'e hatete.

Iha diskursu, ne'ebé halo iha Kapitóliu nia oin, republikanu deklara ona katak "hahú loron ne'e ba oin, Amérika sei sai dahuluk, Amérika dahuluk nian" no deskreve "regra simples rua": "Sosa amerikanu no kontrata amerikanu".

"América dahuluk" la'ós hanesan fraze orijinal ida. Uza ona hosi Charles Lindbergh no hosi grupu ida ne'ebé aviador pertense ona ba Funu Mundial daruak ne'ebé koñesidu ho nia ideia nativista no izolasionista.

Maibé, Donald Trump hatete katak nia pose la'ós signifika de'it "transfere kbiit hosi partidu ida ba partidu seluk".

"Ita transfere kbiit hosi Washington, D.C., no devolve ona nia ba imi, povu", nia hatete no esplika katak klase dominante ne'ebé jere ona nasaun hanoin de'it sira nia interese no "ema sira maka selu nia folin sira".

"Klase estabelesidu proteje nia aan rasik, maibé la'ós ba sidadaun hosi ita nia nasaun. Nia vitória sira la'ós hanesan ita nia vitória sira. Nia triunfu sira la'ós hanesan ita nia triunfu", nia esplika no garanti katak "karnifisina amerikanu ne'e to'o ona rohan no para ona".

"Buat hotu muda iha-ne'e no agora. Momentu ne'e hanesan imi nia momentu no pertense ba imi", nia hatutan.

"Ita, sidadaun sira Amérika nian, mai ita hamutuk iha esforsu nasional boot ida hodi harii fali ita nia nasaun no restaura nia promesa ba ema hotu. Hamutuk, ita sei determina Amérika no mundu nia dalan ba tinan barak nia laran", nia garanti.

Donald Trump, ne'ebé manán eleisaun iha koléjiu eleitoral, maibé iha votu ki'ik duké adversária Hillary Clinton, hatete ona katak "ema millaun resin halibur ona ba movimentu istóriku ida ne'ebé mundu nunka asisti" no "feto no mane sira ne'ebé nasaun haluha agora sei la haluha".

Taxa sira aprovasaun Trump nian tuun hahú hosi nia eleisaun, maibé diskursu inklui referénsia oituan ba tentativa hodi halo uniaun iha nasuan.

Referénsia úniku ba ema minoria sira, ne'ebé barak liu maka apoia demokrata sira, akontese bainhira nia esplika katak ema sira ho kór oioin terus ona ba nasaun.

"Atu ita hanesan ema metan, ema kór xokolate ka ema mutin, ita hotu iha raan hanesan, raan mean, hosi asu-wa'in sira", nia hatete no hatutan: Bainhira Amérika iha uniaun, sei labele hapara América".

Trump hetan beibeik krítika tanba uza ema nia tauk sira hodi sai popular, maibé iha diskursu ne'e nia garanti ona katak laiha razaun atu tauk.

"Labele tauk. Ita hanesan protejidu no sei hetan protesaun nafatin [hosi forsa sira lei no militar sira]... mo importante liu, ita hetan protesaun hosi Maromak", nia esplika.

Kona-ba prezensa amerikanu nian iha mundu, Trump hatete katak Estadus Unidus sei la obriga nia estilu moris ba ema seluk, maibé sei "hetan susesu maka'as hodi nune'e ema bele tuir" no ne'ebé nia administrasaun sei halakon "terorizmu radikal islámiku" iha mundu ne'e.

Trump hatete katak "tempu atu ko'alia hotu ona, agora to'o ona oras ba asaun" no nia hakotu ho adaptasaun ida hosi nia slogan kampaña nian.

"Mai ita halo fali Amérika sai forte. Halo fali Amérika sai riku. Mai halo Amérika sai orgullozu fali. No, loos duni, hamutuk, ita sei halo fali Amérika sai boot fali", nia hakotu.

Barack Obama kumprimenta Trump bainhira hakotu diskursu, hodi hatete "serbisu di'ak".

Donald Trump hanesan, hahú hosi prezidente dahuluk EUA nian, George Washington, iha tinan 1789, prezidente EUA dahuluk lahó esperiénsia militar no polítiku.

Iha tomada pose, marka prezensa hosi eis-prezidente Jimmy Carter, George W. Bush ho Bill Clinton, akompaña hosi nia feen no eis-kandidata prezidensial hosi demokrata, Hillary Clinton.

SAPO TL ho Lusa - Foto@ Michael Reynolds /EPA