terça-feira, 21 de março de 2017

Kandidatu Kalohan Kongratula Lú-Olo Liuhosi Telefone

DILI, (ANTIL) – Kandidatu António da Conceição ‘Kalohan’ ohin fó ona kongratulasaun ba nia rival Francisco Guterres Lú-Olo relasiona ho públikasaun rezultadu provisoriu apuramentu munisipál ne’ebé mak Sekretariadu Tékniku Administasaun Eleitorál (STAE) konklui.

“Ha’u hanesan kandidatu ne’ebé mak okupa segundu lugár, maibé ba ha’u kuandu Dr. Lu-Olo mak manan eleisaun ida ne’e mós, ba ha’u presiza ita kongratula tanba ami rua la’ós kontesta malu maibé ami rua hakarak asume responsabilidade ba Nasaun nian”, Kalohan ba ANTIL liuhosi telefone, Tersa (21/3).

António kongratula tanba haree ba rezultadu provisoria favorese tebes ba kandidatu Lú-Olo hodi sai aman nasaun RDTL iha periudu 2017 to’o 2022.

“Ha’u pessoalmente telefone ona ba Dr. Lu-Olo espresa ha’u nia sentimentu, tanba povu mak julga ona nia, merese atu hetan tanba konfiansa maihosi povu”, realsa.

Entertantu nu’udar kandidatu, Kalohan lamente ho prosesu eleisaun ne’ebé mak regula ho oras, nune’e votante barak mak la konsege ezerse nia direitu.

Lei ne’ebé mak halo la-kondis ho realidade Timor-Leste, hetok prejudika tanba haree ba geografikamente Timor nian, ema tenke lori tempu mak la’o to’o iha fatin urna maibé hafoin iha urna labele ezerse direitu tanba tuir orariu STAE urna taka iha tuku 15.00 lokraik. “Suai kuaze ema 3 mill mak la-vota, ida ne’e kontribui atu halo derota ba ema ruma, tanba ne’e presiza hadi’a iha futuru”, Kalohan sujere.

Ba militante no simpatizante Partidu Demokrátiku (PD), Kalohan apela, rezultadu ne’ebé mak iha, povu nia konfiansa, importante ba PD no nia militante sira presiza moris hakmatek iha ambiente pás hodi ema ida-idak hala’o nia kna’ar, kontribui ba dezenvolvimentu Nasaun.

“Eleisaun bele iha kontekstasaun, maibé ida ne’e la-lori diferénsia ba ita Timoroan, husu atu PD aseita rezultadu ne’ebé mak iha”, Kalohan apela. (Jornalista: Manuel Pinto - Editora: Rita Almeida) 

Foto: António da Conceição 'Kalohan'

Sem comentários: