terça-feira, 21 de março de 2017

Fatuk Mutin: Prezidente Eleitu Labele Haluha Promesa Polítika

PARTILHAR
DILI, (ANTIL) – Kandidatu António Maher Lopes ‘Fatuk Mutin’ hato’o nia parabéns ba Prezidente eleitu hodi husu atu labele haluha promesa polítika ne’ebé mak fó sai durante kampaña.

“Parabéns, hanoin katak ho povu nia konfiansa ne’e, promesa polítika ne’ebé mak fó sai hanesan baze fundamentál ba susesu Estadu ne’e”, fatuk Mutin ba ANTIL via telefone, Tersa (21/3).

Nia hatutan, parabéns tanba povu sei fó konfiansa, tantu husi partidu ou husi personajen jerál mak liu ho prezidente eleitu hatudu, povu nia konfiansa sei iha nafatin.

Prezidente eleitu, Fatuk Mutin ho esperansa bele haree nafatin saida mak promete ba povu tanba konfiansa ne’e kuaze maioria. “Sei maioria mak fiar hanesan ne’e iha konfiansa tomak katak manifestu vontade populár ne’e povu fó fiar”.

Biban ne’e, nia mos hato’o obrigadu ba eleitór sira. “Obrigada ba sira nia boa vontade no sira nia opsaun, mesmu oituan de’it, ida ne’e mak ha’u bele fó ba sira no sira intende husi ha’u”, katak tan. “Fó votus ba ha’u labele dehan sira hili tanba asidentál maibé sira hili ho konsiénsia”.

Nune’e nia agredese ba partidu sira, povu maubere, voluntáriu sira no jornalista tomak ne’ebé divulga ona informasaun, ba povu tomak ne’ebé fó apoiu ona ba nia,  sempre boa sorte, nia dehan.

Ba povu tomak Fatuk Mutin apela labele lamenta iha loron ikus, sei hili ho konsiénsia duni labele lamenta, hili ona tenke aseita ho realidade. “Hein katak manifestu vontade populár ne’e, labele lamenta no krítika maibé tenke simu konsekuénsia saida de’it mak mai tanba ida ne’e mak Estadu no governu fó ba sira”, katak.

Ida ne’e tuir nia, atu eduka povu katak ita hili ho konsiénsia, labele hili tanba istória ou tanba saida, maibé tanba nia hatene saida mak nia hili. (Jornalista: Julia Chatarina ~Editora: Rita Almeida)

Foto: Fatuk Mutin. Foto espesiál
PARTILHAR

Author: verified_user

Publicação luso-timorense sem fins lucrativos

0 comentários: