terça-feira, 21 de março de 2017

Kandidatu Lú-Olo Hato’o Parabéns Ba Povu Tomak

PARTILHAR
DILI, (ANTIL) – Kandidatu Prezidenti Repúblika ne’ebé provisoriu sai vensedór iha eleisaun prezidensiál, Francisco Guterres ‘Lú-Olo’, hato’o parabéns ba povu tomak tanba bele hili nia ba Prezidenti Repúblika ho porsentu 57 hosi totál votante rihun atus tolu resin.

“Ha’u kontenti tanba povu mós kontenti ho rezultadu ida ne’e. Povu husik hela sira nia votu hodi lori ha’u atu ba duni iha Aitarak-Laran,” nia hato’o espresaun ne’e ba jornalista sira sede Comité Central da FRETILIN (CCF), Komoro, Dili, Tersa ne’e.

Lú-Olo mós kongratula ninia maluk kandidatu sira seluk.  Nia dehan, ninia maluk kandidatu sira seluk iha fuan boot simu rezultadu eleisaun tanba demokrasia sempre hanesan ne’e duni. Nia hatutan, nia liuhusi esperiénsia lakon dala rua ona maibé sempre simu ho fuan boot.

“Kandidatu na’in hitu sempre simu rezultadu ida ne’e ho fuan boot, katak rezultadu demokrasia ninian maka hanesan ne’e duni. Ha’u fiar metin ba ha’u nia-án katak liafuan ne’ebé ha’u hateten sei sai prezidenti ba povu Timor-Leste no kandidatu sira seluk sei nafatin timoroan para ita hotu bele serbisu hamutuk hodi dezenvolve ita nia rain”, eis Prezidenti Parlamentu Nasionál esklarese.

Kona-ba tasa partisipasaun eleisaun ne’ebé menus, Lú-Olo hatán, tasa partisipasaun iha eleisaun menus ne’e husu ba Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE) tanba órgaun rua ne’e responsabiliza asuntu ne’e no nia hein katak iha eleisaun parlamentár mai ne’e haree fali métodu foun para lori sidadaun sira ba tuir eleisaun.

Iha fatin hanesan, Sekretáriu Jerál Partidu FRETILIN, Marí Alkatiri husu ba apoiante kandidatu Lú-Olo bele festeza vitória maibé tenki respeita lei no Konstituisaun. Labele halo barullu hodi distúrba órden públiku. (Jornalista: Xisto Freitas - Editora: Rita Almeida)

Foto: Kandidatu Prezidenti Repúblika, Francisco Guterres Lú-Olo
PARTILHAR

Author: verified_user

Publicação luso-timorense sem fins lucrativos

0 comentários: