Taur ‘Rejeita’ Na’in ba PLP

DILI, (ANTIL) – Prezidenti Repúblika, Taur Matan Ruak ‘rejeita’ nu’udar na’in ba Partidu Libertasaun Povu (PLP) relasiona ho deklarasaun ne’ebé halo iha munisípiu Baucau, foin lalais ne’e. 

“Imi ba haree estrutura  PLP ne’e Taur Matan Ruak laiha, Prezidenti ko’alia de’it, naran laiha, laiha legalidade ida katak tebes ida ne’e Taur Matan Ruak”, Xefi Estadu hatan ba jornalista sira iha Palásiu Prezidensiál Aitarak-Laran, Sesta, (10/3).

Planu involve iha partidu kuandu remata mandatu, hodi esklarese, seidauk fó apoiu ba kandidatu António da Conceição ‘Kalohan’. “Ha’u seidauk deklara atu fó apoiu ba kandidatu ida hosi kandidatu nain ualu ne’e”, afirma.

Isabel Ferreira nu’udar espoza ne’ebé akompaña kandidatu ‘Kalohan’ iha propaganda eleitorál, eis gerilleiru ne’e konsidera, desizaun ema ida-idak nian iha nasaun demokrátiku la’ós reprejenta Taur Matan Ruak.

Nu’udar ema númeru um iha Nasaun ne’e, husu ba povu atu fihir didiak kandidatu sira iha loron 20 Marsu. “Hili ida ne’ebé besik povu, hatene povu nia moris ho realidade povu nian”, alerta ba jornalista sira.

Eis ulun boot FALINTIL-FDTL ne’e informa, durante vizita ba liur asina ona nota intendementu kuaze 224 (atus rua nulu resin haat), foin mak implementa rua nulu resin ida (21). “Ha’u mo’e fali, di’ak liu ita lalika ba hatudu oin demais, depois ita nia uma laran sabraut”, Taur hato’o hodi esklarese ninia vizita ba suku sira.

Tuir nia observasaun, partisipasaun eleisaun prezidensiál tinan ne’e menus kompara ho tinan lima ba kotuk. Tanba tinan ne’e, kandidatura nain ualu de’it kompara 2012 ema nain 13. Maibé, kontente haree jerasaun foun hahú teste kapasidade atu lidera Nasaun.

Agradese Servisu Jornalista

Okaziaun ne’e, agradese mós servisu jornalista Timor-oan ne’ebé durante ne’e fó apoiu ba prosesu dezenvolvimentu. “Mídia nia papel importante, kontenti imi nia servisu, másimu fó informasaun ne’ebé atuál no realidade”, Xefi Estadu hato’o durante sorumutu ho jornalista nasionál, internasionál no dirijente mídia iha salaun Xina Palásiu Prezidensiál.

Antes remata mandatu, hakarak halo vízita ba mídia sira. “Ha’u nia vízita suku hotu ona, se imi hakarak ha’u sei ba, maibé imi lakohi ha’u la ba karik, imi keta dehan ha’u ba buka votu, ha’u hadomi imi”, esklarese.

Eis ulun boot FALINTIL-FDTL ne’e,  husu ba jornalista sira kontinua kapasita-án sai professionál no husu ba governu atu kria kondisaun, liliu formasaun. (Ekipa Kobertura - Editora: Rita Almeida)

Foto: Prezidenti Repúblika, Taur Matan Ruak iha okaziaun vízita hafoin diálogu ho komunidade Baguia, munisípiu Baucau. Foto Mídia Palásiu Prezidensiál