domingo, 12 de março de 2017

Laiha Osan Ba Manutensaun Estrada

PARTILHAR
DILI - Estrada iha rai laran liu-liu sidade Dili oras nee kontinua at maske halo seidauk too tinan 5. Pior liu tan mak laiha orsamentu atu halo manutensaun ba Estrada neebe mak at.

Informasaun nee fo sai husi Prezidente Komisaun E neebe trata asuntu Infraestrutura Transporte Komunikasaun, Pedro da Costa, ba STL Sesta (10/03/2017) iha PN-Dili.

Estrada sira neebe aat fali ona nee Governu sei la hadia lalais tanba, liu husi orsamentu jeral do estadu tinan 2017 nian la tau osan atu halo mantensaun rutina ba estrada neebe aat, maske haree ba kategoria Estrada nee emerjensia tebes maibe, Governu labele hadia lalais tanba osan laiha,” hatete Pedro.

Pedro hatutan, infraestrutura rai laran too agora nafatin sai preokupasaun ba ema hotu, tanba estrada iha rai laran kontinua taka kuak no loke kuak, hodi influensia agrikultor atu asesu ba merkadu.

Iha fatin hanesan deputadu, Paulino Monteiro hateten, tinan ida nee la tau osan ba halo mantensaun rutina,  liu liu estrada tanba tinan ida nee nakonu ho elisaun rua.

Alokasaun osan bele laiha maibe, sei iha meus seluk neebe maka Governu atu halo nee maka bele foti osan husi aitem seluk, hodi halo mantensaun ba estrada sira sira neebe maka grave los ona, tanba ita labele husik too aat los ona maka foin hasai osan dalan ida, nee ita sei gasta osan boot, tan nee tenke hadia neneik ona,” dehan Paulino.

Nunee mos Diretur Luta Hamotuk, Mericiu Akara hateten, kada tinan aloka osan boot ba iha Ministeriu ida idak maibe, haree infraestrutura iha rai laran nafatin sai prekupasaun ema hotu nian, projetu balun lao lalais maibe nia kualidade laiha, no balun lao dolar demais hanesan iha Farol nian, estrada nee lao besik tinan ona maibe, seidauk finaliza hela deit.

Ita haree projetu iha Dili laran deit maka lao rungu ranga, no iha area remotas sira nee parese pior liu, povu labele asesu ba merkadu tanba kondisaun estrada ladiak, tan nee governu tenke toma konsideirasaun,”informa nia.

Alende nee Vice Ministru Obras Publiku Inacio Moreira hateten, governu halo hela esforsu atu haree Estrada sira neebe maka laiha kualidade, dala ruma Estrada nee hetan estragu tanba mudansa klimatika ou udan nee mai la para tan nee, impaktu ba kondisaun Estrada tenke aat, maibe governu sei buka meus atu hadia. Madalena Horta

Suara Timor Lorosae
PARTILHAR

Author: verified_user

Publicação luso-timorense sem fins lucrativos

0 comentários: