terça-feira, 1 de agosto de 2017

Fundu Minarai Mihis, Governu Kontinua Deve

PARTILHAR
DILI – Reprezentante povu iha uma fukun Parlamentu Nasional (PN), preokupa ho osan neebe governu impresta atu halo dezenvolvimentu iha rai laran. Tanba haree ba osan husi fundu mina rai, hela deit Biliaun 16, oinsa atu selu fila fali tusan sira nee.

Preokupasaun nee hatoo husi Prezidente komisaun neebe trata asuntu infraestrutura, Manuel Castro ba STL, Tersa (01/08/2017) iha nia knaar fatin PN.

“Ita haree katak tusan neebe governu deve nee kontinua aumenta ba bebeik, ita impesta atu hadia drainazen iha Dili laran, no halo portu, aeroportu nee uza osan imprestimu hotu, tauk maka ita nia osan hotu tusan mos kontinua aumenta, tan nee governu foun mai labele kria tan tusan,” dehan Castro.

Tuir Deputadu nee katak, governu foun neebe sei mai tenke tau importansia ba area infrastrutura, atu nunee bele dada investor sira mai hodi fo resetas hodi selu hikas tusan no bele responde ba nesesidade povu nian.

Iha fatin hanesan Deputadu Domingos de Carvalho mos hatutan, governu hatene deve maibe sira mos hatene dalan ida neebe atu selu fila fali ema nia osan nee.

Nunee mos Deputadu Paulino Monteiro mos hatutan, haree ba osan husi fundu mina no gas nian hela deit ona uituan tanba nee, governu foun mai tenke redus deve, ho nunnee fasil atu selu fila ema nia osan sira nee. Madalena Horta

Suara Timor Lorosae
PARTILHAR

Author: verified_user

Publicação luso-timorense sem fins lucrativos

0 comentários: