Fundu Petróleu iha Trismestre Daruak Billaun U$16,50

DILI, (TATOLI) – Fundu Petrolíferu iha trimestre daruak husi loron 1 abríl to’o 30 juñu 2017 hamutuk billaun U$16,50 kompara ho fundu ba trimestre dahuluk nian husi janeiru to’o marsu 2017 ho montante billaun U$16,26, informa Diretór Ezekutivu Jestaun Fundu Petróleu, Banku Sentrál Timor-Leste (BSTL), Venancio Alves Maria.

Totál reseita ne’ebé mak simu iha trimestre ne’e hamutuk millaun U$95,65 ne’ebé kompostu husi kontribuisaun kontribuinte sira ba fundu hamutuk millaun U$41,76 no pagamentu royalty ne’ebé simu husi Autoridade Nasionál Petróleu millaun U$53,89.

Kompara iha trimestre dahuluk nian reseita ne’ebé tama hamutuk millaun U$104,37 ne’ebé kompostu husi kontribuisaun kontribuente ba fundu hamutuk millaun U$53,77 no pagamentu royalty ne’ebé simu husi Autoridade Nasionál Petróleu millaun U$50,51.

“Osan ne’ebé mak sai durante trimestre ida ne’e hamutuk millaun U$243,94 kompostu husi millaun U$240 transfere ba orsamentu Estadu  no millaun U$3,94 ba kustu jestaun ninian”, Venacion hatete iha Avenida Bispo de Madeiros, Akait, ohin.

Bainhira soma osan ne’ebé sai ho osan ne’ebé mak tama no uza de’it resita, nia balansu millaun -U$148,29.

Rendimentu husi investimentu fundu nian hamutuk millaun U$392,58 kompostu husi kupaun no jurus ne’ebé simu mak millaun U$95,05 mudansa iha valór merkadu nian millaun U$168,68 no movimentu kambiais mak millaun U$128,84 iha trimestre ne’e.

“Retornu fundu ninian iha termu persentanjen, retornu portofoliu mak 2,38% kompara ho rendimentu referénsia mak 2,41%”.

Jornalista: Maria Auxiliadora | Editora: Rita Almeida

Foto: Diretór Ezekutivu Jestaun Fundu Petróleu, BSTL, Venancio Alves Maria

Notísia ne’ebé relasiona: http://www.tatoli.tl/2017/05/reseita-mina-rai-janeiru-marsu-millaun-u10437