Ramos-Horta: Laiha senáriu ne'ebé la admiti Fretilin hodi lidera Governu

Iha loron-tersa ne'e eis-Prezidente timoroan José Ramos-Horta konsidera ona katak laiha "justifikasaun ka senáriu ruma" ne'ebé maka la admiti Fretilin, partidu ne'ebé manán lejislativu, hodi lidera Governu foun tuirmai.

"Laiha justifikasaun ka senáriu ruma hodi la admiti Fretilin hodi lidera Governu. Até pelumenus hatudu prova hosi nia kapasidade", José Ramos-Horta hatete iha Díli.

"Ita tenki fó fiar ba sé maka manán ona eleisaun sira, ba sé maka durante tinan 10 nia laran la halo asaun mínimu, hahalok ruma, hodi hakarak hamosu konflitu governasaun nian bainhira iha ema sira seluk nia liman laran. Timoroan ruma ne'ebé hakarak nasaun nia di'ak tenki fó oportunidade ba Fretilin hodi governu no ita hotu tenki apoia", nia hatete.

Ramos-Horta ko'alia ba Lusa oras antes Tribunal Rekursu le desizaun ne'ebé konfirma rezultadu ikus sira hosi eleisaun sira loron 22 Jullu nian, ne'ebé Fretilin sai hanesan partidu ne'ebé hetan liu votu.

To'o agora no maski deklarasaun vitória hosi Frente Revolucionária do Timor-Leste Independente (Fretilin), partidu daruak ne'ebé hetan liu votu, Congresso Nacional da Reconstrução Timorense (CNRT), seidauk ko'alia kona-ba saida maka atu halo.

Xanana Gusmão, prezidente CNRT nian, "lakon" hosi vida públika iha Timor-Leste hahú hosi loron votasaun nian no partidu hanoin ona halo reuniaun ida hosi Komisaun Polítika Nasional no Konferénsia Nasional ida, maibé eventu rua ne'e adia tiha ona.

Fonte hosi CNRT hatete ona ba Lusa katak konferénsia bele hala'o de'it iha loron 09 Agostu, no Dionísio Babo, personajen ida hosi ema sira ne'ebé iha kbiit iha CNRT, defende ona iha deklarasaun sira ba Lusa katak relasionadu ho estatutu Konferénsia Nasional hanesan fatin di'ak ida ba partidu hodi desidi saida maka atu halo, maibé ema hotu iha interese hodi mantén Governu "estável" ida ba tinan hirak tuirmai.

Sei hanesan sedu hodi hatene opsaun saida maka sei halo hosi partidu daruak ne'ebé maka simu liu votu. Babo, bainhira hatán kona-ba karik CNRT sei hatán governa ho Fretilin, nia fó hanoin katak partidu rua ne'e serbisu di'ak ona iha pasadu.

"Maibé ami tenki ko'alia iha nível internu hodi foti desizaun, no hanoin ba expresaun hosi vontade popular votu nian, no vontade hosi Prezidente Repúblika nian, ne'ebé hakarak Governu estável ida", nia hatete.

Nia konfirma ona katak, iha nível instituisaun nian, Fretilin ho CNRT seidauk ko'alia no fonte sira hosi partidu rua ne'e konfirma ona ba Lusa katak líder na'in rua, Mari Alkatiri ho Xanana Gusmão, seidauk mós ko'alia ida.

Ramos-Horta admiti ona katak hanesan "loloos atu CNRT hein to'o fó sai desizaun hosi Tribunal Rekursu nian", maski "partidu sira seluk, sosiedade sivil tomak, komunidade internasional felisita ona ema timoroan sira, CNE no STAE no partidu ne'ebé manán".

Eis-xefe Estadu htete ona katak "laiha ema ida maka iha espetativu" no katak líder sira hosi partidu tomak "senti hakmatek hodi hein atu Prezidente Repúblika konvida, iha hakat dahuluk, partidu ne'ebé maka hetan liu votu, Fretilin, hodi harii Governu, no hodi rona partidu sira seluk".

"Sei iha partidu ne'ebé manán nia liman-laran hodi ko'alia kona-ba formasaun hosi governu ida ne'ebé lidera hosi Fretilin", Ramos-Horta hatete.

Prezidente timoroan karik sei konvoka partidu sira hodi harii Governu iha oras 48 tuirmai ne'e.

Kona-ba auzénsia hosi Xanana Gusmão, Ramos-Horta admiti ona katak "ema balun husu tansá maka laiha pozisaun loloos no lalais hosi parte CNRT nian, hodi rekoñese rezultadu".

"Preokupasaun ne'e hanesan mós lejítimu. Maibé ba ha'u laiha razaun ba preokupasau. Xanana okupadu beibeik, la'ós ho reflesaun ne'ebé tenki halo hafoin eleisaun sira ne'e maibé mós preokupadu ho prosesu hosi negosiasaun sira ba fronteira sira", nia hatete no refere ba ronda ikus hosi kontaktu sira kona-ab tema entre Timor-Leste ho Austrália.

"Ha'u tenki hatete katak independentemente hosi Governu ne'ebé de'it, ho ka lahó CNRT, ho ka lahó Xanana, pozisaun hosi ami tomak maka Xanana Gusmão ho nia ekipa tomak timoroan no internasional tenki kontinua ho ami nia konfiansa tomak, ami nia apoiu, hodi lidera prosesu negosiasaun kona-ba fronteira tasi nian ne'e", nia hatete.

"Ne'e hanesan klaru tebes", nia hatutan.

SAPO TL ho Lusa