Komemora Loron Falintil ba 42, PR Husu Labele Haluhan Valores Falintil

DILI - Atu Komemora aniversariu loron Falintil ba dala 42 neebe maka monu iha loron 20 Fulan Agosto tinan nee, maka Prezidente Republika Francisco Guterres Lú Olo husu ba F-FDTL tenke tane aas nafatin valores Falintil no resistensia  nian.

Lia hirak nee hatoo husi Vise Xefe Estadu Maior Jeneral F-FDTL Brigadeiru Jeneral Filomeno Paixao ba jornalista sira hafoin remata enkontru seminal ho Prezidente Republika Francisco Guterres Lú Olo iha Palasiu Presidensial Bairo Pite, Kuarta (9/8/2017).

Tuir Filomeno katak kona ba 20 komemorasaun aniversariu loron Falintil nian liu husi enkontru ho Prezidente Republika Francisco Guterres Lú Olo husu instituisaun F-FDTL tenke realiza halo didiak ho solenidade, labele haluhan valores Falintil, valores resistensia nian no vertudes Falintil nian.

Vise Xefe Estadu Maior Jeneral F-FDTL Birigadeiru Jeneral Filomeno Paixao katak husi enkontru ho Prezidente Republika nee mos koalia konaba dezemvolvimentu iha area defeza, durante nee foka liu ba kestaun konseitu estratejiku militar neebe maka halo ona maibe tenke dekores ona planu estratejiku lolos.

Iha biban hanesan Ministru Interior Longuinhos Monteiro neebe maka akompania husi Ministru Defeza Cirilo Cristovao depois remata enkontru ho Prezidente Republika Francisco Guterres Lú Olo iha Palasiu Presidensial Bairo Pite, ba jornalista sira hateten nudar enkontru semenal neebe maka informa ba Prezidente Republika kona sistuasaun seguransa. Natalino Costa

Suara Timor Lorosae | Foto iha Forum Hakesuk