Kuinesementu Komunidade Ba HIV/SIDA Laiha

DILI - Sekertari Ezekutivu Comisaun Nasional Combate Hiv-Sida (CNCS-TL) Daniel Marcal hateten, komunidade  barak  seidauk iha konesementu diak kona-ba transmisaun no prevensaun ba moras HIV-SIDA, tanba komunidade rasik lakohi tuir atividade kampania  hodi rona informasaun kona-ba konsekuesia  HIV.

Ita preokupa husi dadus neebe regista hahu 2003 too Fulan Marsu 2017 iha ona kazu 705. Husi numeru ida nee 28%  idade reprodutivu (14-25), maibe 60% idade adulto katak forma ona uma kain signifika ransu livre nee mos akontes ba kaben nain sira,” katak Daniel ba STL iha nia servisu fatin Pantai Kelapa (29/8/2017).

Tuir nia katak, comisaun kontaktu ona ho Igreja atu iha akompaniamentu ida nee, tanba kaben nain balu mos barak involve ransu livre no seksu livre.

“Ami kontaktu ona ho igreja atu iha akompaniamentu ida neebe intensive ho kaben nain foun sira, tanba komunidade barak seidauk iha kuinesementu diak kona-ba transmisaun no prevensaun ba moras HIV tanba komunidade rasik lakohi tuir atividade kampania sira hodi rona informasaun,” hateten Daniel.

Iha fatin ketak Eurico da Costa de Jesus nuudar Xefe Suku Comoro husu, komunidade sira atu sai autor ba iha kombate virus ida nee no moras sira seluk iha suku laran tanba ema nia hahalok, komportamentu mak sai faktor determinante ba kombate moras sira nee.

Tuir Eurico, komunidade liuliu familia tenke forte tanba familia kuandu fraku fasil tebes moras sira ne’e atu tama hodi estraga familia.  Inan-aman sira tenke aprende fo valor ba sira nia-an rasik keta haluhan akompania oan sira nia moris.

Tanba joventude no labarik sira barak utilize ona droga liuliu halo tatu ba sira nia isin, fuma sigaru neebe bele lori sira ba iha risku tanba nee inan-aman tenke sai exemplu ba oan sira.

Nia informa total uma-kain iha Suku Comoro hamutuk total uma-kain iha Comoro delapan ribuh empat ratus delapan puluh tiga (8.483).

Iha fatin hanesan Juanina Oliveira nuudar komunidade Suku Comoro hateten, atividade sosializasaun  Comisaun Nasional Combate Hiv-Sida halao nee importante ba populasaun tomak iha rai ida nee, maibe dala barak   partisipasaun nee maximu husi komunidade.

“Tanba ita haree barak mak lakohi rona informasaun nee, realidade CNCS-TL mai dala rua ona halo sosializasaun iha Suku Comoro maibe komunidade barak  lakohi mai. Maske e ita hatene katak informasaun nee inportante ba ita nia saude no futuru ba oin,”afirma Juanina. 

Jeniche da Costa | Suara Timor Lorosae