terça-feira, 1 de agosto de 2017

Tentativa atake ba aviaun australianu ho liña investigasaun oioin

Suspeitu na'in haat ne'ebé tenta halo atentadu kontra aviaun ida, iha Austrália, hakarak uza gás tóxiku ida ka bomba ida ne'ebé halo rasik ne'ebé disfarsa iha mákina tetak na'an nian, refere hosi imprensa australianu iha loron-segunda ne'e.

Primeiru-ministru Austrália nian, Malcolm Turnbull, hatete ona katak planu ne'e iha faze avansadu ida, maibé lakohi halo komentáriu ba métodu kontraditóriu sira ne'ebé maka fó sai hela hosi imprensa.

Suspeitu sira, mane na'in haat ho nasionalidade rua (australianu ho libaneza), akompaña hosi sira nia oan, kaer ona iha loron-sábadu ne'e iha Sydney.

Tuir jornal Sydney Daily Telegraph, sira hanoin atu tau bomba ne'e iha bagajen ne'ebé lori iha liman no tau iha kabin pasajeiru sira nian iha semo ida entre Austrália no destinu ida iha Médiu Oriente.


Bomba ne'ebé halo rasik karik tau iha mákina ida hodi tetak na'an, haktuir hosi notísia.

Planu hanesan refere mós hosi jornal Sydney Morning Herald.

Jornal The Australian, ne'ebé haktuir fonte oioin, hakerek katak suspeitu sira hakarak hatama iha aviaun laran "bomba ida ne'ebé la'ós tradisional" no bele liberta gás tóxiku ida.

Fonte sira hosi The Australian hatete katak gás ne'e bele hamosu imobilizasaun ka mate lalais hosi okupante sira aviaun nian durante semo.

"Ha'u tenki respeita inkéritu", ne'ebé maka halo daudaun, hatete hosi Turnbull ne'ebé lakohi ko'alia kona-ba informasaun ne'ebé maka avansa hosi imprensa.

"Sei iha informasaun seluk iha loron hirak tuirmai", primeiru-ministru hatete hodi refere ba "motivasaun terorista sira" hosi suspeitu sira.

Maibé aumenta ona medida sira seguransa nian iha aeroportu tomak iha nasaun ne'e.
Austrália aumenta ona nível alerta nian hasoru atake terorista sira iha fulan-Setembru 2014, hafoin tauk ba posibilidade hosi atentadu sira ne'ebé organiza hosi grupu extremista sira hanesan Estadu Islámiku.

Tuir autoridade sira, hafoin 2014, neutraliza ona atentadu hamutuk 10 resin no besik ema na'in 70 maka hetan ona akuzasaun ba terorizmu.

SAPO TL ho Lusa

Sem comentários: