Alkatiri: Governu Foun La Mantein “Status Quo”

DILI: Formasaun Governu foun sei halo mudansa totál bainhira partidu mais votadu, FRETILIN, mak hetan oportunidade hodi forma VII Governu Konstitusionál.

Sekretáriu Jerál Partidu FRETILIN, Mari Alkatiri, abertamente deklara ona katak, kritériu ne’ebé partidu mais votadu opta hodi formasaun governu la’ós atu mantein “status quo”. Katak, sei halo mudansa barak iha governasaun foun mai.

La’ós ne’e de’it, partidu FRETILIN konxiente katak akontese hela korrupsaun iha nasaun ne’e. Tanba ne’e, prioridade ida mak atu hamoos Korrupsaun, Koluzaun no Nepotizmu (KKN).

Partidu FRETILIN mós kontinua nafatin ninia programa ne’ebé promete ona durante tempu kampaña polítika eleisaun lejizlativa liubá, hodi hadi’a no haburas Timor-Leste.

“Governu foun la’ós mai halo kontente de'it ita. Governu foun mai atu hadi'a no haburas Timor-Leste. Governu foun atu hamoos KKN. La’ós mantein "status kuo. Ne'e maka kritériu ba Governu foun”, hakerek Sekjer FRETILIN, Mari Alkatiri, iha ninia média sosiál Facebook.

Lere Hakarak Jerasaun Tuan Kaer Ukun

Xefe Estadu Maiór FALINTIL-Forsa Defeza Timor Leste (F-FDTL), Majór Jenerál Lere Anan Timur, husu ba jerasaun foun labele ambisiozu hodi ukun nasaun, tanba país ne’e sei presiza jerasaun tuan sira hodi ukun.

Tuir eis-gerrilleiru ne’e, jerasaun foun sira seidauk iha maturidade polítika no egotizmu domina hela.

Ne’e duni, husu ba Xanana Gusmão, José Ramos Horta, Taur Matan Ruak, Francisco Guterres ‘Lú-Olo’ ho Mari Alkatiri kontinua hamutuk hodi ukun nasaun ne’e sai dezenvolvidu liután.

Jenerál fitun rua dehan, jerasaun tuan sira presiza ukun nasaun ne’e to’o tinan 10 mai mak entrega hikas ba jerasaun foun sira.

“Ita hatene katak ita nia jerasaun foun matenek, maibé presiza mós esperiénsia ukun no mós hametin nia nasionalizmu makaas”, dehan Lere, iha Kuartél Jerál Fatu hadaDili, horisehik.

Nia dehan, bainhira jerasaun tuan sira labele ona mak entrega ba jerasaun foun ukun fali nasaun ne’e, tanba nasionalizmu no patriotizmu jerasaun foun sei menus.

Ne’e duni, dala di’ak liu jerasaun tuan mak ukun nasaun ne’e.

“Ha'u husu ba jerasaun foun labele laran moras, keta ansi ukun nasaun ne’e,” dehan Lere.

Lere haktuir, maski eleisaun ne’ebé foin lalais hala’o ne’e timoroan mak manan hodi forma governu ne’e, bainhira ema seluk husi rai li'ur ukun nasaun ne’e mak la di’ak.

Bainhira timoroan luta kontra hasoru inimigu durante tinan 24 objetivu ukun rasik aan. Bainhira ukun ho responsabilidade ba nasionalizmu no patriotizmu.

Tanba ne’e, husu ba Xanana, Mari Alkatiri, Ramos Horta Matan Ruak, Lú-Olo di'ak liu ukun nasaun nasaun keta ansi entrega ba jerasaun foun sira, tanba uluk halo funu hakarak independénsia la’ós halo funu hadau kadeira.

Independente