Taur Lider Umanista Fó Osan Vitalísia Ba Estudante

DILI, (TATOLI) - Eis-prezidente Taur Matan Ruak (TMR) nu’udar lider ezemplár no umanista tanba nia osan pensaun vitalísia fó ba estudante husi família kbiit laek hodi kontinua sira-nia estudu iha ensinu superiór.

“TMR la hanoin de’it ba nia aan maibé hanoin oinsa joven sira hakarak sai matenek mós. Tanba ne’e, ha’u hanoin katak nia lider ezemplár ida no lider umanista,” Eis-koordenadór Uniaun Estudante Universitáriu Munisípiu Baucau (UEUMB), Amandio dos Santos hateten ba Ajénsia TATOLI, ohin, husi nia estudu fatin, nasaun amigu, Portugal.

Amandio sente orgullu ho eis-xefe estadu, Taur Matan Ruak basa hatudu laran luak hodi ajuda joven sira ne’ebé laiha kbiit atu kontinua sira-nia estudu iha nível ensinu superiór husi osan privilejiu nian “Pensaun Vitalisia”.

Ho nune’e hanesan jerasaun foun no nu’udar sidadaun ida, orgullu tebes ba eis-prezidente TMR.

Estudante ne’e mós aperesia TMR tanba hatudu duni katak, entre aman sira ba nasaun, nia aman ida mós ba ema hotu tan konsidera osan la’ós valor liu nia aan maibé ema mak iha valór, hakarak ema kbiit laek mós hetan oportunidade hanesan ema seluk hodi asesu edukasaun hodi liberta aan, depois liberta povu.

Amandio mós konsidera katak jestu ne’ebé mak eis-jeneral ne’e hatudu kontribui hodi hakerek naran TMR iha ema nia fuan, la’ós hakerek iha kadernu, tanba ema sira ne’ebé nia apoia ne’e sei hakerek istória husi jerasaun ba jerasaun, naran TMR kahur ho sira-nia ran.

Husu kona-ba nia esperansa ba pensaun vitalísia ne’e, nia hatan katak di’ak liu lei ne’e hatuun ba pursentu 20 no pensaun ne’e bele fó maibé haree ba produtividade kada ema. Se ema ne’e sei forte labele fó, husik ema ne’e hala’o nafatin serbisu mak han.

Maibé lei ne’e kuaze manten hela, maneira seluk mellor mak, hanesan TMR hatudu ona nee, fahe hanesan ba ema kbiit laek sira hodi aproveita hanesan, nune’e sai fali valór sosiu ida.

“Fahe de’it, han hotu lakon ona. Maibe, ne’e investimentu ida ne’ebé koerénsia katak osan povu nian fó fali ba povu no iha rejultadu aban bainrua kontribui fali ba povu. Bainhira joven ne’e matenek hotu bele halo buat diak ba ita rain,” eis-koordenadór UEUMB ne’e fó hanoin.

Alumni eskola sekundária Kay Rala Xanana Gusmão, Manatuto, Valdemar Pascoal hateten, eis-xefe estadu ne’ebé termina nia mandatu hafoin entrega ba atuál Prezidente repúblika, Francisco Guterres, Lú-Olo katak, hanesan mós lider seluk, Taur hadomi tebes nia povu.

Entretantu, antes ne’e, eis-prezidente Taur Matan Ruak liuhusi sentru Quesadhip Ruak entrega tan sertifikadu programa bolsa estudu Taur Matan Ruak ba estudante na’in 22 ne’ebé mai husi família karensiada, vulnerável no desfavoresida, iha sala Arkivu no Múzeu Rezisténsia Timor-Leste (AMRT).

Seluk, bolsa ho tipu hanesan, entrega mós ba benefisiáriu ne’ebé hanesan hamutuk ema na’in 26.

Jornalista: Rafy Belo | Editór : Manuel Pinto

Foto: Eis-prezidente Taur Matan Ruak (TMR). Foto: Media eis-prezidente