terça-feira, 1 de agosto de 2017

Solidaridade-Fraternidade “Kesi” TL ho CPLP

DILI, (TATOLI) - Prezidente Repúblika, Francisco Guterres, Lú-Olo, hatete katak ligasaun Timor-Leste ho CPLP (Comunidade dos Países da Língua Portuguesa) espesiál tanba relasaun solidaridade, fraternidade, istória no kultura ne´ebé fahe hamutuk ba malu.

“Tempu no interasaun ajuda hola parte ba identidade nasionál timoroan sira,” hateten xefe estadu, Francisco Guterres, Lú-Olo iha abertura meza-kabuar “Ba Ajenda Ida Demokrátika husi Jerasaun iha Ásia-Oseánia” iha salaun MNEC, Praia dos Coqueiros, Díli, horseik.
Xefe estadu ne´e haklaken, naturalmente, iha nível bilaterál no multilaterál, ami dezempeña papel relevante hodi apoiu ami-nia serbisu iha dezenvolvimentu no konsolidasaun ba instituisaun sira.

Apoiu ba dezenvolvimentu parseria ne´e importante tebes ba ami no valór ne´ebé aas ba povu Timor-Leste. Kooperasaun ida ne´e kontribui ba haforsa regra lei nian, ba dezenvolvimentu rekursu umanu liliu ba kualifikasaun joven timoroan sira.

“Apoiu husi ami-nia parseiru sira ajuda ami hodi promove dezenvolvimentu sosiedade sívil, ho órgaun sira ne´ebé autonoma liu no preparadu hodi halo sira lian bele rona,” akresenta Komandante Supremu Forsa Armada ne´e.


Hodi reforsa katak iha tinan lima no neen ikus ne´e, ami-nia parseria sira fokus liu ba esforsu nasionál atu dezenvolve diversifikasaun no ekonomia sustentável, hakbiit foinsa´e sira hodi asesu empregu inklui jerasaun foun povu timoroan iha prosesu konstrusaun nasaun.

Entretantu, hafoin restaurasaun indepedénsia, Timor-Leste nu´udar membru plenu direitu ida ba CPLP alende Angola, Brasil, Cabo Verde, Guiné-Bissau, Guiné-Equatoriál, Moçambique, Portugal no São Tomé e Principé.

Durante nia inkluzaun, iha 2014-2016, Timor-Leste prezide nia prezidénsia rotativa hafoin entrega ba Brasil, iha 30 juñu 2016 husi prezidente sesante, Taur Matan Ruak.

Jornalista: Rafy Belo | Editór: Manuel Pinto

Foto: Media PR/Julião Fernandes

Sem comentários: