Aban, Partidu Koligasaun Aprezenta Kandidatu Primeiru Ministru Ba Prezidente Repúblika

DILI (TATOLI) - Partidu tolu ne´ebé halo koligasaun hanesan FRETILIN, Partidu Demokrátiku (PD) no Kmanek Haburas Unidade Timor Oan (KHUNTO), sei aprezenta kandidatu Primeiru Ministru Sétimu Governu Konstitusionál ba Prezidente Repúblika (PR), Dr. Francisco Guterres Lú Olo hodi hetan nomeiasaun iha aban (kuarta) tuku haat lorokraik.

Partidu tolu ne´e halo konsensu eskolla Sekretáriu Jerál FRETILIN, Dr. Marí Alkatiri ba Primeiru Ministru liuhusi reuniaun entre partidu tolu ne´ebé hala´o iha sede Comité Central da FRETILIN, Fatuhada, Dili,  ohin (tersa) tuku lima lorokraik.

  

Molok aprezenta Primeiru Ministru, partidu tolu ne´e sei asina uluk akordu koligasaun iha sede CCF, aban tuku 11:00 dader. Dokumentu akordu ne´e prontu ona no partidu tolu laiha objesaun ba konteudu akordu.

“Ezijénsia atu dudu ha´u ba Primeiru Ministru aumenta ba beibeik. Ha´u tenta duni buka dalan seluk maibé ohin liuhusi konsulta ho personalidade balun, ha´u aseita kandidatura ba Primeiru Ministru,” Marí Alkatiri informa ba jornalista sira iha sede CCF, hafoin enkontru finalizasaun akordu entre partidu tolu.

Marí dehan Sétimu Governu sei laiha vise Primeiru Minisitru, maibé probabilidade iha de´it Ministru Estadu no membru governu sei la liu ema na´in 30. Nia hatutan Governu Koligasaun ne´e sei involve personalidade balun ne´ebé la´ós mai hosi partidu tolu refere.

Tuir informasaun katak loron tomada pose ba membru governu sira sei defini hosi Prezidente Repúblika. 

Jornalista: Xisto Freitas

Foto: Imajen espesial