Alkatiri Ba PM, D. Virgilio Apresia Tanba Povu Hein Hela Rezultadu

DILI – Bispo Dioseze Dili, Dom Virgilio do Carmo da Silva, SDB apresia ba bloku koligasaun, neebe nomeia Sekretariu Jeral Mari Alkatiri ba Primeiru Ministru, tanba ema hotu hein hela rezultadu formasaun governu.

Lia fuan nee hatoo husi Bispu Dioseze Dili, D. Virgilio do Carmo da Silva katak, haree ba bloku koligasaun nomeia Mari Alkatiri ba PM, tanba durante nee povu fo fiar ba Fretilin sai nudar partidu vensedor ou manan maioria simples.

“Tuir lei mos katak sekjer husi partidu neebe manan maioria mak bele sai PM, neebe karik tuir duni ida nee, i ita hotu agradese, i hau apresia tanba agora dadaun povu hein hela rezultadu formasaun governu,” katak D. Virgilio ba jornalista hafoin remata hasoru malu ho Prezidente PN iha Diocese Dili, Lecidere, Kuarta (13/09/2017).

Bispu nee fiar katak formasaun governu sira bele halao too tinan 5 remata, atu nunee programa hotu neebe iha povu sira mos hakarak goja. Buat neebe importante hakarak atu mantein estabilidade, garante unidade hodi lori governu too rohan.

Tanba nee husu ba governu atu kontinua hakaas aan halo ezersisiu boot nee hodi tane nafatin interese povu nian tuir komprimisiu neebe sira halao ona. 

Guilhermina Franco | Suara Timor Lorosae