Lideransa Tuan Tenke Lori Jerasaun Foun Ba Futuru Nabilan

DILI, (TATOLI) – Eis lider rezisténsia no ulun boot FALINTIL-FDTL, Lere Anan Timur, husu ba lideransa tuan sira atu lori jerasaun foun ba futuru ne’ebé di’ak ba dezenvolvimentu nasaun no povu.

“Ha’u husu ba Primeiru-Ministru nu’udar mós Prezidente Partidu FRETILIN, Marí Alkatiri, Prezidente Partidu CNRT, Xanana Gusmão, Ministru Estadu no Konselleiru ba Seguransa Nasionál, Ramos Horta no sira seluk tenke iha dever morál no polítika atu lori jerasaun foun sira ba moris di’ak iha futuru”, Lere iha nia diskursu iha kongresu RENETIL (Rezisténsia Nasionál Estudante Timor-Leste) ba da-hituk iha Sentru Konvensaun Dili, kinta, (15/3).

Átual Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, realsa nu’udar aman ba nasaun tenke preokupa oan sira nia futuru tanba kuandu katuas ona, sé mak atu haree oan sira.

“Se ohin ha’u mate karik ha’u nia oan sira nia futuru oinsá, ami idade tuan ona entaun ami la preokupa ona ami nia futuru maibé ami futuru mak jerasaun foun sira”, afirma.

Kuandu jerasaun foun nia futuru garantidu, signifika ita nia nasaun mós sei garantidu tanba poténsia barak atu dezenvolve ba moris povu nian liliu ba jerasaun foun sira.

“Ami nia esperansa mak imi sei lori nasaun ne’e ba oin, imi bele moris hakmatek no haksolok iha ambiente patria ba dezenvolvimentu”, katak.

Lere hatutan tan: “Polítiku sira dehan  prefere liu ba maun boot Xanana Gusmão ho Taur Matan Ruak maibé ha’u prefere sira hotu hanesan tanba ne’e sira tenke hamutuk”.

“Ita boot sira tenke hanoin imi nia oan sira eh jerasaun foun hodi halo buat ruma eh buat di’ak atu lori nasaun ne’e ba oin tanba jerasaun foun sira di’ak tebes no matenek”, afirma tan.

Nia haktuir uluk dehan lakon títulu duke lakon pátria, ohin loron kuandu dehan lakon títulu signifika lakon duni ona tanba konsekuénsia mak atu buka servisu dasa rai mós sei la hetan.

Nia husu ba loriku aswain, Renetil no juventude hotu ne’ebé uluk fó nia kontribuisaun ba funu libertasaun nasionál, tenke fó liman ba malu hodi lori nasaun ne’e ba dezenvolvimentu.

Jornalista: Zezito Silva | Editora: Rita Almeida

Imajen: Xefe Estadu Maiór FALINTIL-Forsa Defeza Timor-Leste (F-FDTL), Major Jenerál Lere Anan Timur