AMP Hahú Diskute Kargu PM

DILI: Rezultadu provizóriu hatudu ona sinál vitória ba partidu koligasaun Aliansa Mudansa ba Progresu (AMP). Ne’e duni, iha tempu badak Kuadru polítika sei diskute kargu Primeiru Ministru.

Prezidente AMP, Kay Rala Xanana Gusmão hateten, sira seidauk diskute kargu Primeiru Ministru, tanba lider másimu AMP nian seidauk tuur hodi deside kargu ne’e.

“Kona-ba kargu Primeiru Ministru ami seidauk ko'alia, tanba Naimori sei sai hela”, dehan nia, iha sede CNRT Bairru-Grilos, Dili, horisehik.

Tanba ne’e, kargu Primeiru Ministru ba VIII Governu AMP sei diskute hodi anunsia iha públiku, nune’e públiku mós bele hatene entre Xanana Gusmão no Taur Matan Ruak se maka atu lidera Governu ne’e.

Nune’e, Xanana dehan, tuir loloos iha Parlamentu Nasionál hamutuk kadeira 65. Ne’e duni, AMP iha kadeira 33, signifika maioria ona iha Parlamentu Nasionál ho posibilidade forma ona Governu.

Nia dehan, AMP antes ne’e koligasaun ona, ne’e duni la presiza forma tan koligasaun iha parlamentu nasionál. Nune’e, AMP mós sei la harii governu inkluzaun sosiál no unidade nasionál, tanba hamriik mesak.

Tuir nia, bainhira AMP hetan kadeira 32 maka prontu halo negosiasaun ho partidu seluk hodi forma Governu, maibé ho kadeira 33 ne’e sei la negoseia ho partidu seluk.

Maski nune’e, antes ne’e Prezidente Jurídiku AMP, Arão Noe de Jesus hateten, partidu koligasaun AMP sei hili figura na’in rua kaer kargu primeiru ministru maka Xanana Gusmão no Taur Matan Ruak, bainhira forma duni VIII Governu.

Tanba ne'e, loke odamatan nafatin ba partidu ho koligasaun sé de'it halo koliga. Nune'e, AMP iha ona kompromisu ida hodi deside lider na'in rua ne’e maka atu kandidata ba kargu xefe governu.  

Xanana-Taur Ba PM La Presiza Diskute

Entretantu, observadór polítika, Camilo Ximenes hateten, entre figura rua Xanana no Taur Matan Ruak maka sai primeiru ministru la presiza diskute tan.

“Sira na’in rua ne’e ita bele dehan katak merese hotu atu sai Primeiru Ministru konforme fila-fali ba bloku koligasaun maka bele halo konsensu”, dehan nia.

Ba bloku koligasaun ne’e labele duvida tanba sira mai ho hanoin ida de’it hodi harii AMP. Tanba ne’e, ba sira na’in rua ne’ebé sai figura xave importante tanba sira na'in rua ida sai Xefe Governu ne’e la sai kestaun.

Nune’e, jurista timoroan, Manuel Tilman hatete, ba Xanana Gusmão no Taur Matan Ruak sira rua ne’e iha ai-laran troka malu hodi komanda funu hodi monta estratéjia hodi manan funu difisil ne’e.

Ne’e duni, iha ukun aan ne’e Xanana sai ona Prezidente Repúblika no sai ona Primeiru ministru no Taur Matan Ruak sai Jenerál F-FDTL no Prezidente Repúblika, tanba ne’e sira na'in rua ida atu sai Xefe Governu laiha duvida.  

Independente