quinta-feira, 17 de maio de 2018

SERVE Rejista Ona Komersiál 21.633


DILI, (TATOLI) – Diretór Ezekutivu Servisu Rejistarasaun no Verifikasaun Emprezariál (SERVE), Florêncio Sanches, hatete rejistu komersiál iha SERVE husi maiu 2013 to’o marsu 2018 hatudu progresu tanba aumentu porsentu 300 kompara ho dadus antes estabelese SERVE.IP.

Númeru empreza ne’ebé daudaun iha baze dadus institutu ne’e hamutuk 21.633, iha aumentu tanba Timor-Leste iha ambiente negósiu ida ne’ebé di’ak.

“Tanba ne’e mak ema hakarak rejista. Fulan-fulan aumenta mas tun laiha to’o ohin loron”, Florêncio dehan iha Matadouru, ohin.

Husi númeru 21.633 ne’e porsentu 10 mak ema estranjeiru no porsentu 90 timoroan. “Ema rai-liur signifika ninia ema husi liur, maibé kompañia nasionál. Husi totál ne’e emprezária feto sira hola fatin porsentu 35 to’o 38 signifika kumpri duni saida mak konstituisaun haruka katak fó tempu porsentu 30 ba maluk feto sira”.

Husi persentajen ne’ebé lidera husi feto ne’e maioria tipu negósiu husi médiu mai kraik. Numéru ne’e aumentu kuandu Governu Konstutusionál Dalimak no Daneen hasai polítika ida atu dezenvolve setór privadu.

“Entaun númeru ne’e aumentu dezde iha ne’ebá. Ita konsege kria dekretu lei ida asesu ba finanseira, ne’e ajuda tebes sira. Ida fali mak ita konsege kria plataforma ida ne’ebé ko’alia kona-ba pilár-pilár importante atu so’e ba iha terrenu atu emperezáriu sira foti, ida ne’e mós aumenta tanba ne’e númeru sa’e tebetebes”, katak tan.

Aleinde ne’e Governu servisu hamutuk UNDP kria tan meiu ida ne’ebé halo joven barak hakarak kria sira-nia negósiu rasik.

“Depois de númeru sira ne’e sa’e nia impaktu finanseiru mak empreza sira ne’ebé depois rejista, ezerse sira-nia atividade ekonómika konsege hatama sasán liuhusi portu. Alfándega deteta katak númeru aas tebes iha tinan kotuk. Ministériu Planu no Finansas iha relatóriu tinan rua mai kotuk katak empreza ne’ebé rejista iha SERVE konsege selu ona saláriu funsionáriu públiku iha Estadu nian husi taxa ne’ebé empreza sira selu”.

Florêncio relata iha períodu antes 2013 atu rejista de’it empreza hamutuk 5000 presiza tinan tolu, mas depois de tinan ne’e to’o agora  kompañia ne’ebé rejista hamutuk 21.633 signifika iha aumentu husi 5000 ne’e dala-haat nune’e ho porsentu 300.

“Aumentu ida ne’ebé signifikante tebes tanba meiu ida ne’ebé halo agora atu hetan rejista ne’e simples tebes”.

Nune’e totál firma ne’ebé rejistada tuir nia tipu mak Empresa em Nome Individual (ENIIN) hamutuk 9870, Sociedade Unipessoal por Quotas Limitada (Unipessoal, Lda) 8118, Sociedade por Quotas Limitada (Lda) 3489, Sociedade Anônima (S.A) 59, Representação Permanente (R.P) 94 no Empresa Públika 3.

Jornalista: Maria Auxiliadora | Editora: Rita Almeida

Imajen: Diretór SERVE, Florêncio Sanches. Foto Tatoli/Egas Cristovão

Sem comentários: