quinta-feira, 17 de maio de 2018

Tribunál Deside Sé Maka Manán Tenke Kumpre

PARTILHAR

DILI, (TATOLI) - Sekretáriu Jerál Partidu FRETILIN, Marí Alkatiri hateten partidu koligasaun ne’ebé manán eleisaun antesipada iha kompeténsia atu forma governu no funsiona.

“Bainhira Tribunál deside ona ne’e legál. Hotu-hotu tenke kumpri. Fó biban ba partidu koligasaun ne’ebé vensedór forma Governu,” Marí hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, kinta ne’e, relasiona ho rezultadu eleisaun antesipada ne’ebé oras ne’e prosesu kontajen ba nível nasionál.

Nia dehan FRETILIN prontu ba opozisaun bainhira desizaun difinitiva hosi Tribunál deside katak partidu koligasaun maka vensedór.

“Sai opozisaun ne’e FRETILIN iha nia polítika rasik. Sei la sai aitonka ka kabide ba partidu seluk ne’ebé governa,” atuál Primeiru Ministru Sétimu Governu Konstitusionál ne’e realsa.

Kona-ba lider  balun hosi bloku AMP ezije nia rezigna án hosi ZEESM, Marí hatán, argumentu ne’e la válidu tanba la bazeia ba lei, katak, sasukat saida atu hasai Prezidente Rejiaun Administrativu Espesiál Oe-Cusse Ambenu (RAEOA) hosi Oe-Cusse.

“Eleisaun ida ne’e ba ZEESM, ka eleisaun jerál? Purtantu, ne’e argumentu falsu,” nia kestiona.

Jornalista: Xisto Freitas | Editór: Manuel Pinto

Imajen: Sekretáriu Jerál Partidu Frente Revolusionária Timor-Leste Independente (FRETILIN), Marí Alkatiri
PARTILHAR

Author: verified_user

Publicação luso-timorense sem fins lucrativos

0 comentários: