quarta-feira, 16 de maio de 2018

Situasaun Rai Laran Seguru Hafoin Eleisaun

PARTILHAR

DILI, (TATOLI) – Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, hateten hafoin eleisaun antesipada iha 12 maiu liu-ba, situasaun seguransa rai laran la’o seguru.

“Maske mosu konflitu ki’ik sira iha fati-fatin tanba dezintendementu, maibé problema la grave. Bele dehan situasaun kontroladu. Ita nia forsa militár no polísia mantein nafatin sira nia profisionalidade”, Lere hato’o ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin relata situasaun seguransa rai-laran ba Prezidente Repúblika, Francisco Guterres Lú Olo.

Lere Anan esplika forsa armada no polísia simu mandatu atu halo seguransa hahú hosi tempu kampaña to’o iha 31 maiu, maibé depende ba situasaun, katak, bainhira situasaun manas fali entaun forsa rua seidauk bele retira ba kuartél.

“Depende ba desizaun governu, tanba ita nia forsa iha terrenu mós presiza transporte, hahan no osan. Maibé, ha’u hanoin katak ita nia forsa no seguransa prontu atu serbí no prontu atu kumpri diretiva sira ne’ebé polítiku na’in sira hatún mai”, Lere tenik.

Ulun boot F-FDTL ne’e esklarese misaun interna ne’e la’ós forsa armada nian maibé tanba nu’udar timoroan no hakarak oferese buat di’ak ba Nasaun ka povu, ne’e duni forsa defeza fó apoiu ba forsa seguransa atu garante estabilidade.

Jornalista: Xisto Freitas | Editora: Rita Almeida

Imajen: Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur. Foto Tatoli/Xisto Freitas
PARTILHAR

Author: verified_user

Publicação luso-timorense sem fins lucrativos

0 comentários: