quinta-feira, 17 de maio de 2018

Eleisaun: Apuramentu nasional konfirma AMP nia vitória ho maioria absoluta

PARTILHAR

Prosesu apuramentu ba votu sira iha lejislativu antesipadu loron-sábadu liubá konfirma ona kontajen munisipal ne'ebé fó maioria absoluta ba Aliansa Mudansa ba Progresu (AMP), ne'ebé sei kontrola fatin 34 hosi fatin 65 iha Parlamentu Nasional. 

Informasaun ikus sira konfirma ona hafoin loron tolu halo verifikasaun iha sede hosi Komisaun Nasional Eleisaun (CNE) nian, ne'ebé maka rezolve ona votu reklamadu hamutuk 598 no konfirma ona rejistu ba apuramentu sira.

Tuir informasaun ikus sira, ne'ebé agora tenki sertifika hosi Tribunal Rekursu, Aliansa Mudansa ba Progresu (AMP) manán ona eleisaun sira ho votu hamutuk 309.663 ka 49,6% hosi total, ne'ebé reprezenta maioria absoluta ida hosi fatin 34 hosi parlamentu ida ne'ebé iha fatin hamutuk 65.

Iha fatin daruak maka okupa hosi Frente Revolucionária do Timor-Leste Independente (Fretilin), ne'ebé lidera koligasaun minoritáriu hosi Governu atual, no hetan votu hamutuk 213.324 (34,2% hosi total), mantén nune'e númeru deputadu hamutuk na'in 23.

Iha Parlamentu sei iha mós Partidu Demokrátiku (PD) - parseiru hosi Fretilin nian iha Governu dahitu - ne'ebé lakon deputadu na'in rua, hetan de'it ba na'in lima no hetan votu hamutuk 50.370 ka 8,1% hosi total.

Frente Dezenvolvimentu Demokrátiku (FDD) - koligasaun ida hosi partidu haat ki'ik - ba dala uluk, sei halo parte iha parlamentu no sei iha fatin tolu no hetan ona votu hamutuk 34.301 ka 5,5% hosi total.

Informasaun sira konfirma katak vota ona eleitor hamutuk 635.116 (hosi total resenseadu hamutuk 784.286), ne'ebé reprezenta taxa partisipasaun ida hosi 80,98%, no vota ema liu 51.160 duké iha tinan 2017.

Rejista ona votu nulu hamutuk 7.547, votu mamuk hamutuk 2.995, votu rejeitadu hamutuk 20 no votu abandonadu hamutuk 29.

Laiha forsa polítika haat seluk maka to'o limiti hosi 4% hosi votu válidu sira ne'ebé maka presiza hodi bele hili deputadu sira.

Hosi sira maka Partidu Esperansa Pátria nian (PEP) ne'ebé hetan liu votu ho 5.060 ka 0,8%.

Importante liu maka informasaun sira konfirma valor hosi kontajen votu iha nível munisipal, ne'ebé hanesan responsabilidade hosi Sekretariadu Tékniku hosi Administrasaun Eleitoral (STAE), no iha prátika rezolve ona votu reklamadu hamutuk 600 no diverjénsia ki'ik ruma iha rejistu sira.

Hahú loron-tersa, funsionáriu sira hosi CNE, fiskal partidáriu sira, observador nasional ho internasional sira, akompaña hakat sira, iha momentu ida-idak hosi prosesu apuramentu no verifikasaun nasional ba rezultadu sira.

Konfirma ona rejistu sira, konfirma ona númeru hosi votu reklamadu sira - no hafoin ne'e rezolve tiha ona - no rejistadu distribuisaun ikus hosi rezultadu sira ne'ebé la hanesan, hasoru númeru sira hosi STAE, kuaze hosi de'it distribuisaun hosi votu reklamadu sira.

Kazu importante liu, ne'ebé demora liu tempu hodi rezolve, ne'ebé hanesan mós teste máximu ba sistema kontajen votu nian no konfirma ona transparénsia hosi prosesu tomak.

Maka diferensa ki'ik ida iha meza votasaun rua hosi aldeia ki'ik Opa, iha munisípiu Bobonaro, ne'ebé tenki halo pedidu ba Tribunal Rekursu hodi loke fali urna sira no konta fali votu sira.

Urna ne'e loke fali ho prezensa hosi funsionáriu eleitoral, fiskal partidáriu sira ho jornalista sira hamutuk sanulu resin no verifika ona votu sira. Hafoin diskusaun ruma, ho konfuzaun kona-ba númeru sira, ikusmai hetan ona votu ne'ebé lakon no fó ba PD.

Iha nível jeral no durante prosesu ne'e rezolve ona votu reklamadu hamutuk 598 ho nia distribuisaun hanesan ho kontajen votu iha jeral: maioria ba AMP ho Fretilin.

Informasaun ikus sira hatudu katak polariza votu sira, ho forsa polítika boot rua hetan 83,74% hosi votu sira, aas liu 76,13% hosi tinan liubá.

Informasau sira hatudu katak partidu tolu ne'ebé halo parte AMP konsege aumenta, hamutuk, nia vantajen hasoru Fretilin, hosi 95.510 resin iha tinan 2017 ba 96.339 iha tinan ne'e.

Iha nível global, AMP aumenta nia apoiu total iha votu hamutuk 45.673, no Fretilin aumenta nia apoiu eleitoral iha votu hamutuk 44.844.

Rezultadu aat sira maka hetan hosi partidu sira ne'ebé halo parte iha koligasaun MSD, ne'ebé lakon votu hamutuk 10.485, hosi FDD ne'ebé lakon 5.536 no hosi PD ne'ebé lakon ona votu hamutuk 5238.

AMP manán ona iha maioria hosi munisípiu sira, liuliu iha Aileu, Ainaro, Bobonaro, Kovalima, Díli, Ermera, Liquiçá, Manatuto, Manufahi no mós iha Rejiaun Administrativu Espesial hosi Oecusse-Ambeno (RAEOA) no iha sentru ne'ebé instala iha Koreia-Súl.

Fretilin manán iha munisípiu tomak hosi leste nasaun nian, Baucau, Lautem ho Viqueque no mós iha Austrália, Portugal ho Reinu Unidu.

Iha tinan liubá, partidu sira ne'ebé halo parte hosi AMP manán ona - bainhira votu sira konta hamutuk - iha munisípiu tomak, la konta ho Lautem ho Viqueque no iha estranjeiru.

Prosesu konfirmasaun hosi rezultadu sira hotu ho sertifikasaun hosi informasaun ikus sira hosi Tribunal Rekursu ne'ebé sei hala'o durante findesemana ne'e.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: