sexta-feira, 16 de novembro de 2018

Konsidera G7+ Gasta Osan, Helder: Direitu Espresaun

PARTILHAR

DILI, (TATOLI) - Sekretáriu Jerál G7+, Helder da Costa konsidera kritika sira ba G7+ durante ne’e, katak gasta osan de’it, ida ne’e hanesan direitu espresaun, maibé nia husu bainhira públiku menus informasaun bele hakbesik an ba edifísiu G7+.

“Ida ne’e investimentu boot ida iha longu prazu iha multilateralizmu. Iha krítika barak dehan G7+ gasta osan de’it, maibé ida ne’e direitu espresaun ema ida-idak nian. Hakarak hatene de’it katak ema ne’ebé menus informasaun bele hakat ba G7+ hodi fó esklaresimentu di’ak hodi nune’e bele hatene,” Helder da Costa ba jornalista sira iha Palacio Governu, ohin.

Entretantu, G7+ foin lalais ne’e propoin ona orsamentu ho millaun U$ 1,5 ba governu no lori ona ba parlamentu atu diskute. Ba ida ne’e, tuir Helder iha nasaun barak iha mundu kuandu hakarak atu halo kampaña, ema bolu dehan non permanent security cauncil member sira gasta osan ho mínimu millaun U$ 30 ba eventu ida de’it ba tinan rua. Enkuantu Timor-Leste millaun ida resin de’it, maibé konsege manan no hetan simpatia hosi mundu internasionál.

Ho susesu hirak ne’e, ohin Governu liuhosi Reuniaun Konsellu Ministru sujere ba organizasaun G7+ hodi kontinua promove harii pás iha nivel globál, hodi nune’e Timor-Leste bele projeta nafatin mensajen ka imajen iha mundu.
  
“Ami hetan konvite hosi Primeiru Ministru no  Ministru Prezidénsia Konsellu Ministru. Hodi halo aprezentasaun prevee ida kona-ba lala’ok G7+ nian iha nivel internasionál no nasionál, no governu husu atu kontinua promove harii pás iha nivel global hodi projeta Timor-Leste nia mensajen iha mundu,” Sekretáriu Jerál G7+, esplika razaun hasoru Primeiru Ministru.

Nia dehan, Konsellu Ministru apresia tebes kona-ba papél G7+ nian, fó parabéns no haruka kontinua servisu ba oin. Tanba Timor nu’udar nasaun ki’ik iha mundu ita tenke pro-ativu.

Nune’e duni, G7+ servisu hamutuk ho Ministériu Negósiu Estranjeiru no membru nasaun 20 hodi kontinua nafatin promove harii pás iha Estadu no iha nivel globál hodi nune’e bele projeta nafatin Timor-Leste nia mensajen iha mundu internasionál.

Enkuantu, tinan oin mai sei iha reuniaun ministeriál ida iha Lizboa, reúne ho nasaun 20 inklui ita sei halo eventu boot ida iha New York ka high level political forum kona-ba oinsá mak ita bele alkansa objetivu dezenvolvimentu sustentável.

Jornalista : Zezito Silva | Editór: Manuel Pinto

Imajen: Sekretáriu Jerál g7+, Helder da Costa, atualiza programa no atividade g7+ ba Ministru Prezidensia Konsellu Ministru, Agio Pereira, iha Palásiu Governu, ohin. Foto António Goncalves
PARTILHAR

Author: verified_user

Publicação luso-timorense sem fins lucrativos

0 comentários: