Vaga Ba Sensu Agríkola 2019 Sei Taka Sai Iha Tempu Badak

DILI, (TATIOLI) – Diretór Jerál Estatístika Ministériu Finansa, Elias dos Santos Ferreira, hatete iha tempu badak ekipa Sensu Agríkola 2019 sei halo koordenasaun ho administradór munisípiu to’o suku atu nune’e bele taka sai vaga iha kada suku.

“Hodi nune’e ita-nia alin sira ne’ebé maka hakarak atu serbisu iha Sensu Agrikultura sira bele ba apply (konkorre). Suku ida-idak sei rekruta ema husi ninia suku, pur tantu ema Baukau labele bá Maliana no Maliana labele bá Baukau, tanba ami sei rekruta mais de 3000 e tal”, Elias informa ohin iha ámbitu enkontru sobre preparativu ba Sensu Agríkola 2019 iha Komoro.

Prezidente Sensu Agríkola ne’e hatete rekrutamentu ne’e sei halo ba entrevistadór hamutuk 1.293, ema ida ka’er GPS hodi sukat natar no to’os 646, supervizór sira 646, treinadór 200, kondutór 40 no pesoál ne’ebé ajuda iha sekretariadu hamutuk 40.

“Prosesu rekrutamentu nia kritéria ami prepara hotu ona ne’e maka ami sei bá munisípiu sira depois vaga sira sei taka iha kada suku la’ós mai fali rekruta iha munisípiu”, dehan.

Nia hatutan: “Treinadór sira ne’e maka ami sei rekruta iha nasionál tanba ida ne’e ami sei fó treinamentu iha ne’e (Dili) para sira bele fó fali treinamentu ba ita-nia entrevistadór, uza GPS sira iha kada postu administrativu hanesan esperiénsia iha sensu 2015”.

Nia afirma orsamentu ba sensu ne’e maioria ho porsentu 85 mai husi Governu. “Tanba saida ha’u dehan mai husi Governu, mai husi Governu para ita bele kondús ita-nia án rasik. Ita tau iha orsamentu husi hahú to’o iha nia diseminasaun, la’ós ba de’it atividade iha terrenu, maibé diseminasaun to’o iha munisípiu maizumenus milliaun 5”.

“Kustu balun ne’e sei bá selu ita-nia entrevistadór sira, mais de 500 mil ne’e ita selu ita-nia joven sira ne’ebé sei serbisu iha suku sira ne’e, balun ita sei hola android tanba ita sei muda ita-nia sistema husi kestionáriu ba fali android atu nune’e ita bá entrevista no dadus ne’e bele haruka lalais mai nasionál atu ita bele analiza no bele publika”.

Tanba ne’e iha marsu no abríl halo sensu no iha inísiu agostu bele iha rezultadu prelimináriu no rezultadu finál fó sai iha outubru atu nune’e Ministériu Agrikultura bele halo planu ba 2020 bele uza ona dadus ne’e.

Antes ne’e fó sai katak atu rekruta pesoál Sensu Agríkola hamutuk 4.700 maibé iha mudansa ba númeru mak daudaun planeia ona atu rekruta fali ema 3000 resin.

Jornalista: Maria Auxiliadora | Editora: Rita Almeida

Imajen: Diretór Jerál Estatístika Ministériu Finansa, Elias dos Santos Ferreira. Foto/MAP.