PR Sei Estuda OJE Tuir Knaar Konstitusionál

DILI, (TATOLI) – Prezidente Repúblika, Francisco Guterres Lú Olo, sesta semana ne’e simu ona proposta reapresiasaun lei Orsamentu Jerál Estadu (OJE) 2019 hosi Prezidente Parlamentu Nasionál, Arão Noé de Jesus, atu análiza no estuda bazea ba kna’ar konstitusionál.

“Ha’u sei halo estudu no análiza ba dokumentu ida ne’e bazea ba artigu 95 númeru 3, 2, artigu 145 konstituisaun nian ho artigu 88 númeru 3 para bele kumpre artigu 88 númeru 1″, dehan Xefe Estadu ba jornalista sira iha Kuartel Jerál F-FDTL Fatuhada, ohin.

Xefe Estadu apresia ba maturidade polítíka deputadu ne’ebé konsidera pedidu hosi elimina proposta orsamentu milliaun $650 hodi sosa asaun hosi kompañia ConocoPhilips no Shell.

“Ha’u apreso bo’ot tebes tanba konsidera saida maka Prezidente Repúblika hato’o ba sira, signifika prezidente nia opiniaun ba veto ida ne’e iha duni rezultadu, hodi halo reapresiasaun ba dokumentu ida ne’e bele hadi’a lori fila fali ba prezidente”, tenik tan.

Entretantu, kna’ar presidente repúblika tuir konstituisaun RDTL artigu 88 iha númeru 1 no 3. Alinea 1. prazu loron 30 nia laran, hahú hosi simu diploma naran ida husi Parlamentu Nasionál atu promulga hanesan lei, Prezidente-Repúblika bele promulga eh uza direitu vetu nian, hodi husu apresiasaun foun kona-ba lia-tatoli ne’e ho fundamentu no Alinea 3). Ne’e mós sei presiza, maioria baluk-tolu rua (2/3) deputadu sira-ne’ebé prezente, no tenke liu maioria absoluta Deputadu sira-ne’ebé serbisu hela, atu konfirma diploma sira-ne’ebé iha matéria artigu 95 nian.

Jornalista: Agapito dos Santos | Editora: Rita Almeida

Imajen: Prezidente Repúblika, Francisco Guterres Lú Olo, iha selebrasaun transformasaun FALINTIL ba FALINTIL-FDTL ba dala 18 iha kuartel jerál Fatuhada, ohin. Imajen António Gonçalves Majór Jenerál F-FDTL, Lere Anan Timur, iha selebrasaun transformasaun FALINTIL ba FALINTIL-FDTL ba dala 18 iha kuartel jerál Fatuhada, ohin. Imajen António Gonçalves