quarta-feira, 19 de maio de 2021

Justisa Ba Ema Hotu

DILI, STLNEWS.co – Sosiedade sira konsidera katak, justisa neebe iha rai ida nee tenke ba ema hotu.

“Atu hetan lia los neebe iha justisa neebe iha rai ida nee tenke ba ema hotu, labele haree ba diferensa moris neebe iha,” dehan Akademika UNTL Romerio Maria ba STL iha TDD, Tersa (18/05/2021).

Nia hatutan, ohin loron nia haree sevisu iha tribunal komesa mudansa ona, ema barak neebe halo sala kumpri ona sira nia sala, maibe iha ema balu maka sei bele dehan seidauk koopera ho justisa masimu.

Nia esplika tan, justisa nee atu lao ba oin, presiza mos fo kapasitasaun kontinua ba ema hirak neebe servisu iha area justisa, atu ho kapasidade neebe diak hodi lori justisa nee lao ba oin.

Iha fatin ketak, Juiz Administrador Tribunal Distrital Dili, Afonso Carmona dehan, atu lori justisa lao ba oin, ema hotu presiza enkoraja tribunal, atu sira bele halao serbisu ho diak.

“Hanoin importante tebes ema hotu atu enkoraja tribunal hodi bele halao servisu ho diak, tanba ho enkoraja no hanoin balu bele mos hadia buat balu neebe lao lalos,” dehan nia.

Nia afirma tan, ohin loron juiz Timor oan barak ona, tanba nee espera ba futuru ho rekursu umanu nee sentru formasaun prepara, bele aumenta tan numeru juiz iha TL.*

Reportajen: Terezinha de Deus | Editora: Domingas Gomes

Sem comentários: