DISSOLVE FFTL ..!!!

Jornal Nacional, editorial

Juventude hadomi Futebol ‘AMANTE’ ohin loron nee halo manifestasaun kontra dirijenti Federasaun Futebol Timor Leste (FFTL) hodi ejiji reformasaun no ejijensia estreñu liu mak hakarak dissolve FFTL tamba konsidera iha mafiozu iha Federasaun Futebol nee ninia laran.

Problema nebe FFTL infrenta, li-liu membru FFTL simu subornu hodi halakon Timor Leste iha jogu Sea Games nee bele dehan hanesan mos problema nebe FIFA infrenta, li-liu korupsaun iha FIFA nee mak iis to’o ona mai Timor Leste.

FIFA ohin loron nee bele dehan sei hanesan ‘ Ayam kehilangan induknya’, kongresu FIFA iha fulan kontuk, Presidente FIFA Joseph Bleter eleitu ba kintu mandatu maibe ikus mai rezigna an tamba Intelejen Amerika nian kaptura figura importante sira iha FIFA nia laran nebe komete korupsaun.

FFTL durante nee sai hanesan pontu antesaun publiku, li-liu juventude hadomi futebol ‘ AMANTE’ tamba buat barak mak konsidera lao lalos iha federasaun nian laran hodi nunee halo dezenvolvimentu Futebol iha Timor Leste lalao ba oin .

Atu hadia futebol iha Timor Leste, AMANTE dala barak halo manifestasaun no hakerek karta ba FIFA atu halo mudansa no reforma lideransa iha FFTL maibe FIFA kontinua kaer metin no apoia lideransa, Presidente Federasaun Futebol Timor Leste, Francisco Kalbuadi Lay tamba Kalbuadi Lay nudar susesor Presidente FIFA Josep Bleter.

Uluk AMANTE hakilar FIFA taka tilu, AFC taka tilu, ohin loron hakilar FIFA bele rona karik, AFC mos bele rona karik tamba kazu subornu nebe involve ofisiais FFTL nian hodi halakon ekipa Timor Leste sai nudar evidensia forte ba FIFA no AFC tetu hodi fo solusaun ba ejijensia sira nee.

Preokupasaun AMANTE nian ba desenvolvimentu Futebol iha Timor Leste nee tamba Federasaun Futebol Timor Leste hetan subsidiu anual husi FIFA, governu mos injeta osan 100 mil dolar amerikanu kada tinan liu husi Orsamentu jeral Estadu nian maibe desportu Futebol nee lao iha fatin deit, laiha mudansa signifikativu.

Timor Leste kuandu partisipa jogu interansional, FFTL preokupadu buka ema rai laran la hetan ona tenki halai ba Brazil no Portugal halo certidaun falsu iha loron ida rua nia laran sai ona sidadaun Timor Leste ho pasaporte Timor nian, maske lahatene koalia tetun.

FFTL gosta jogador naturalizasaun nee tamba laiha kompetisaun domestika hodi nunee lahatene semak melhor jogador, dalabarak tempo labele ona bolu malu deit, joga diak ka joga at, importante lori bandeira Timor Leste iha iventu internasional sira nee.

Agora demostrasaun kontra FFTL nee diak, naran katak kontinua lao iha koridor demokrasia, respeitu malu no labele hetan sansaun husi FIFA hanesan PSSI Indonesia. Ohin loron nee bele kritika FFTL, Krtitika Presidente FFTL Francisco KalbudiLlay nian ba desenvolvimentu futebol.

Maibe keta haluha katak intermus desenvolvimentu fisiku, Kalbuady mos susesu tamba konsege mobilize apoiu FIFA nian mai Timor Leste, FIFA House rua no konstroe kampu demokrasia sai nudar kampu referensia, Presidente FIFA visita Timor Leste nebe halo PSSI Indonesia mos admira ba lideransa Francisco Kalbiuadi nian .

Agora importante mak autor sira nebe deskonfia manipula ka simu subornu hodi halo lakon ekipa Krokodilu iha Sea Games nee presisa hetan atensaun espesifiku, eh se bele tenki prosesa tuir lei Timor nian tamba aktu nebe nia halo nee nudar trasaun ida ba nasaun nee. *

Jornal Nacional, editorial