Loronsa’e,
nia mós hader dolar sai hosi toba-fatin ba tuur iha uma tatis be nia kakuluk
taka ho duut nia okos. Nia fihir tuir nia maun no bin na’in ne’en (6) be hatais
farda no sapatu ba eskola. Nu’udar oan ikun no ema ho defisiénsia, moris ho
kondisaun ain rua kiik hanesan ai-kesak, lori nia loron ba loron tuur hakdasak
hakuak nia hirus matan hodi hateke ba dook. Bainhira maka nia bele hatais farda
hanesan ninia maun-bin no labarik hirak seluk be rame-rame ba eskola, la’o
haksoit tutuir dalan iha nia oin, hakilar ho livre, hamnasa reket nehan hanesan
loro-matan nia roman halo aifunan dubun sira naklekar ho ksolok.
Dalawa’in
nia tuur hamnasa mes-mesak. Dalaruma nia tuur hakruuk fihir ba ninia kondisaun
fíziku be la normál, nia senti sai obstáklu ba ninia inan aman no maun bin
sira. Ba nia moris ne’e folin la’ek. Tanbasá? Nia aman Paulo Perreira Martins
fila hikas ona ba Maromak nia uma. Nia inan faluk Candida Fátima de Araújo sai
“aman” hodi kaer serbisu todan, hisik kosar-wen hodi sustenta sira na’in hitu (7).
Nia hateke ba nia inan be serbisu la senti kolen, nia hahú haloot ‘mehi’
hakarak sai ema ne’ebé susesu iha futuru be mai.
“Ha’u
lakohi atu ha’u nia kondisaun fíziku be la normál ne’e sai todan ida ba ha’u
nia família no ha’u inan doben. Dalan di’ak ne’ebé ha’u hili maka ha’u tenki
husik ha’u nia família ba buka moris rasik. Hosi Maubisse ha’u muda fali ba
Postu Administrativu Turiscai, Suku Beremana, Aldeia Dalubo, hela ho ha’u inan
aman hakiak. Iha ne’e maka foti desizaun atu eskola tanba durante tempu okupasaun
Indonézia ha’u la eskola. Entaun, iha Timor ukun an ne’e, ha’u hakarak eskola,”
dehan Evaristo da Conceição ne’ebé moris iha Maubisse, 21 Outubru 1981, ne’e ba
jornalista Matadalan foin lalais ne’e ho neon todan.
Iha
momentu ne’ebá, nia ba hasoru Diretór Eskola Primária Nú. 09 Beremana,
Domingus Tilman Espírito Santo, atu tau naran ba eskola. Maibé, mestri
haree nia hamnasa sub-subar tanba nia idade boot ona maka eskola hamutuk ho
labarik sira ne’e úniku. Maibé, nia koko konvense mestri hodi bele tuur iha
banku eskola. Akaba tiha eskola primária, nia hatutan ninia estudu iha Eskola
Pré-Sekundária Nú. 01 Kota Laloran iha Postu Administrativu Turiscai no ramata
ninia eskola sekundária iha Eskola Tékniku Professionál Same iha tinan 2009.
“Ha’u
uluk eskola iha fatin ida ne’ebé maka área rurál tebes. Maibé, ha’u tenki dolar
ho liman ho ain hodi luta ba eskola. Até ha’u to’o eskola iha eskola sekundária
Same mós, ha’u sei dolar nafatin dei’t ho liman no ain hodi asesu ba eskola,”
dehan Evaristo ne’ebé kaben ho Francisca Leto ho oan na’in lima (5) ne’e ho
hamnasa midar.
Ba
nia, hamansa hasoru obstáklu maka sai xave ba susesu. Biar dolar de’it ho liman
no ain, nia hakarak dolar sai hosi área rurál hodi horon anin foun iha Sidade
Kapitál Timor-Leste. Ba ida ne’e, nia tenki husik ninia família tomak hodi
la’o-rai buka matenek iha Kapitál Díli. Fou-foun, nia dolar ho ain no liman
buka matenek iha Universidade Nasionál Timor-Leste (UNTL) atu foti sastra maibé
la liu teste. Nia la lakon esperansa. Nia foti desizaun hodi tuir teste iha
Institute of Bussines (IOB) no to’o ikus eskola duni iha ne’ebá hodi foti
Akuntabilidade.
Ba
eskola, nia sempre hetan obstáklu liu-liu kona-ba transporte. Wainhira kada
dader-dader nia aranka ba kampus IOB, dalaruma para kareta pasajeirus
(mikrolet), kareta lakohi para tanba nia ema ho defisiénsia. Tanba ne’e,
agradese ba Maromak, iha loron ida lideransa Fundasaun Klibur foti desizaun
hodi bolu nia hela iha kampus no serbisu hanesan ema volontáriu hodi hamatan ba
internete ne’ebé estudantes asesu. Tanba nia hadomi serbisu ho pasiénsia,
fundasaun fó fiar ba nia sai repórter iha Rádiu Klibur no hala’o mós kna’ar
administrasaun nian.
“Durante
ha’u serbisu, ha’u nia saláriu sufisiente. Uluk voluntáriu ne’e simu osan fulan
$40,00. Pois neineik sa’e ba $70,00. Tanba serbisu badinas demais, ha’u nia
saláriu hasa’e to’o $250:00 no hasa’e to’o liu ida ne’e. Ha’u bele dehan katak
ha’u nia saláriu bele di’ak liu kolega dosente sira seluk ne’ebé sei
kontinua nafatin serbisu iha IOB. Saláriu sira ne’e, ha’u lori selu fali ha’u
nia eskola no osan balun sustenta ha’u nia família tanba iha IOB kada semestre
selu $110,00,” nia dehan hodi lamas hirus-matan dala-dala.
Ho
esperiénsia hirak ne’e maka nia hetan xamada (bolu) hosi Assosiasaun
Defisiénsia Timore-Leste (ADTL) hodi fó apou serbisu iha área teknikál nian
liu-liu iha parte Administrasaun no Empowerment ba membru no organisazaun
ne’ebé maka serbisu hola parte ba ADTL nian.
“Ha’u
kontenti tebes tanba bolu loos ha’u mai iha ha’u nia área rasik, atu hamutuk ho
kolega defisiénsia sira seluk no motiva sira oinsá atu la’o ba oin,” nia
hatete. Evaresto ramata iha Institute of Bussines (IOB), 27 Outubru 2014.
Nia
bele hala’o serbisu ho di’ak tanba iha momentu ne’ebá, nia hetan tulun hosi
ASERT hodi fó “three sicle” ou hanesan kadeira roda ba nia atu lori. Kadeira
roda ne’e maka fó nafatin motivasaun ba nia hodi hala’o ninia serbisu. Nia
hetok la lakon esperansa tanba ADTL bele produz motorizada ida ho modelu
roda tolu (3) hodi fasilita nia ba serbisu fatin no fila ba nia uman.
Esperiénsia
terus lubuk ida ne’ebé nia hetan durante ne’e sai mestri di’ak ba nia atu fahe matenek
ne’ebé nia iha ba ema seluk. Iha ADTL, nia la kolen hodi hakilar ba ninia maluk
defisiénsia sira seluk. Ba ninia kolega sira, nia tatoli katak ema ho
defisiénsia sira hotu tenki haka’as-án labele moe hodi kompete ho ema ne’ebé la
ho defisiénsia. Tenki halakon moe hodi kria espíritu mentalidade ida ne’ebé
forte iha ida-idak nia fuan (hanoin) atu nune’e bele la’o ba oin no hamriik
firme hanesan ho ema ne’ebé la ho defisiénsia. Túr badak hanesan no hamriik ás
hanesan.
“Ha’u
ka’er metin ha’u nia professór primária ida nia liafuan dehan; ‘Ó eskola
didi’ak, ó sei di’ak liu fali ami professór sira’. Ba ha’u nia kolega sira
katak, ita hotu tenki mehi no hatete ba ita nia án rasik katak Maromak sei
hakuak ita nia mehi hotu-hotu. Bermimpilah sebab Tuhan akan memeluk
mimpi-mimpimu—Mehi bá tanba Maromak sei hakuak ó nia mehi tomak tanba
Maromak hakuak ona ha’u nia mehi iha relaidade moris lor-loron,” Evaristo
hatete hodi sita (kutip) liafuan murak iha Novela Sang Pemimpi hosi
Andrea Hirata ba ninia maluk ema ho defisiénsia sira iha ADTL. (Julia M. X.
da Silva)
Sem comentários:
Enviar um comentário