PROSESA IRREGULARIDADE MAP

DILI - Deputadu Joaquim dos Santos, Francisco Branco no Adérito  Hugo da Costa husu ba Ministériu Públiku atu prosesa irregularidade prosesu tenderizasaun projetu ne’ebé akontese iha Ministériu Agrikultura no Peskas (MAP), entre 2011 no 2013.

“Hato’o ba Ministériu Públiku atu prosesa ba tribunál”, deputadu bankada FRETILIN, Joaquim dos Santos ba jornalista sira iha PN, Tersa, (27/10).

Membru komisaun C ne’ebé trata asuntu finansas públika ne’e hatutan, komportamentu polítika hot-hotu tenki halo tuir lei. “Atu membru governu ka diretór  ka funsionáriu bai-bain, viola lei jestaun finanseira, ha’u hanoin tenki ba tribunál”, reprezentante povu ne’e katak.

“Julga uluk ami nai ulun ne’e, para povu haree mós tauk, labele nain ulun sira sala kontra lei i depois ministériu públiku túr nonok de’it hodi julga fali povu ki’ik ne’e labele. Ema na’ok manu ohin, aban ema julga kedas, mais na’ok juta ba juta ne’e nonok, taka metin tiha labele”, afirma nia.

Iha fatin hanesan, deputadu Francisco Branco hosi bankada FRETILIN husu ba MAP tenki hatan ba irregularidade ne’ebé akontese.

“Kestaun ne’ebé auditoria hetan ona, agora hosi ministériu mós fó resposta kona-ba buat sira ne’ebé sira hetan, depois enkamina ba ministériu públiku atu avansa ba oin”, membru komisaun C ne’e hatete.

Nune’e mós, deputadu bankada CNRT, Adérito Hugo hatutan, iregularidade ne’ebé Tribunál Rekursus liu-hosi Cãmara de Kontas detekta, ne’e obrigasaun estadu nian.

“Kada tinan, parlamentu nasionál rekomenda ba tribunál de kontas atu halo auditoria ba liñas ministériais ne’ebé ke tuir parlamentu haree presiza atu halo. Tan ne’e mak rezulta servisu ida ke tribunál de kontas halo”, segundu vise prezidenti PN dehan.

Membru komisaun C ne’e hatutan, kada tinan parlamentu halo diskusaun ba kontas jéral estadu ne’ebé ke auditoria externa mak halo.

“Parlamentu ninia obrigasaun mak atu rekomenda ba tribunál de kontas atu halo auditoria. Rezultadu auditoria fila fali ba instituisaun kompotente hanesan ministériu públiku”, tenik nia.

Nia informa, tribunál de kontas iha ona 30 auditoria ne’ebé mesak Timor-oan hotu, mesmu hetan akompañamentu hosi asesór internasionál sira para fó asistensia atu hasa’e sira nia kapasidade halo auditoria.

Sikun seluk, Ministru Estadu Koordenador assuntu Ekonomia no Ministru Agrikultura no Peskas, Estanislau Aleixo da Silva hatutan, rezultadu auditoria tribunál kamara de kontas haruka ona ba MP hodi aprofunda prosesu investigasaun.

“Horseik (segunda) ha’u ba komisaun C parlamentu nasionál, sira husu ha’u esplika ho rekomendasaun ne’ebé tribunál hasai. Ami konkorda, buat balun ami implementa ona no buat balun ami sei implementa antes proxima ezekusaun orsamentu”, Estanislau ba Timor Post iha Palasiu Governu, Tersa, (27/10).

Nia dehan, bainhira ministériu públiku hakle’an prosesu investigasaun, Komisaun Funsaun Públiku mos sei hola medidas disiplina ba funsionariu ne’ebé karik involve direita iha prosesu ne’e rasik.

Antes ne’e, Tribunál Rekursus liu-hosi Kamara de Kontas detekta ona iregularidade aprovizionamentu, li-liu tenderizasaun projetu MAP iha mandatu ministru Mariano Asanami Sabino.

Prezidenti Tribunál Rekursus, Guilhermino da Silva ba jornalista sira iha nia kna’ar fatin, Kaikoli, Sesta (23/10), hatete, nia parte haruka ona rezultadu auditoria  ba MP hodi prosesa tuir lei.

“Mosu iregularidade barak, tan ne’e rezultadu pareser ami haruka ba ministériu públiku hodi kontinua nia prosesu”, Guilhermino da Silva tenik.(jos/oki)

Timor Post