PR Taur Husu Povu Hili Didiak PR Foun Iha 2017, Hili Kandidatu Prezidenti Kabun Lotuk

ALAS - Prezidente Republika Taur Matan Ruak husu povu tomak iha Timor Leste, atu hili didiak Prezidente Republika foun iha tinan 2017, atu nunee bele lao ba Suku hotu atu hare sira nia kondisaun moris.

Aban bain rua atu hili  Prezidente foun karik, haree didiak, para nia bele mai vizita imi, se hili sala, nia sei lamai vizita imi hanesan hau, hau mai vizita imi tanba domin,” dahan Pezidente Republika Taur Matan Ruak, bainhira dialogu ho komunidade iha Suku Taitudac, Postu Administrativu Alas, Munisipiu Manufahi, Segunda (9/11).

Xefe Estadu nee dehan, nia agradese tanba maske Suku refere estrada ladiak, maibe kareta se bele tama, iha Suku balu Xefe Estadu nee tenke lao loron rua tolu mak foin too.

Xefe Estadu nee dehan, Objetivu husi nia vizita nee, atu transmiti ba povu kona-ba sakrifisiu hotu neebe povu fo hodi too ohin loron Timor Leste sai nasaun independensia.

Hili Presidenti Kabun Lotuk

Presidenti Taur Matan Ruak husu ba povu sira iha Alas, Municipiu manufahi, atu iha elisaun 2017, povu hili Presidenti karik, hili ida neebe mak kabun lotuk, atu nunee nia bele lao, se hili kabun boot nia lao labele.

Aban bainrua hili Presidenti hili sira kabun lotuk, para hadomi karik nia bele lao bele,imi hili sala,nia hadomi imi mai karik nia sei lamai tamba nia kabun todan,” dehan PR Taur, bainhira halo dialogu ho komunidade sira iha suku Taitudac, Segunda (09/11/2015).

Iha fatin hanesan Manuel da Costa ho Silveiro Magno husu ba Presidenti Taur Matan Ruak iha elisaun 2017 bele kandidata aan ba Presidenti, tamba povu sira hakarak Taur Matan Ruak sai nafatin Presidenti iha Nasaun Timor Leste. Carme Ximenes

Suara Timor Lorosae