Bispu Foun Labele Sai “Terrorista Del Chiachere”

Pároku Parókia Manatuto, Pe. Martinho Gusmão husu ba Bispu Foun Dioseze Díli atu fó ezemplu foun, maibé labele sai “terrorista del chiachere” (liafuan italianu). Katak, bisu-bisu iha kotuk atu hateten át maluk sira no halo ema tauk atu hatudu-án, hatudu ninia kualidade no kapasidade hodi subar án ka falun án iha “humildade falso” nia laran.

Nia ko’alia ida ne’e tanba dalaruma padre no madre sira halo buat ne’ebé Papa Francisco dehan “il terrorismo del chiachere” –halo gosip tun sa’e, hateten át malu sai tiha hanesan terror mentál atu hamonu malu.

“Ne’e la’os de’it polítiku sira, maibé padre sira mós hanesan. Ne’eduni, dalaruma la ajuda malu atu sai padre di’ak no matenek,” Amu Martinho dehan ba Matadalan iha nia kna’ar fatin, Kuarta (03/02/16), bainhira husu ninia pensamentu kona-ba Vatikanu hili ona Bispu foun ba Dioseze Díli.

Eis Diretór Komisaun Justisa no Páz Dioseze Baucau ne’e sujere ba Bispu foun keta haluha Papa Francisco nia apelu atu halo “revolucao da ternura” (revolusaun fuan matak-malirin). Estadu no Igreja ohin loron hasoru hela mentalidade eroizmu, hanoin katak funu-na’in sira maka sai “Maromak aileu” hodi troka tiha Maromak Lalehan nian, halakon justisa no damen no integridade da kriasaun. Bispu tenki koko atu loke ibun ona, loke fuan no hanoin ba sofrimentu foun: injustisa ne’ebé mosu hosi “developmentalism”. Tan de’it dezenvolvimentu ita sakrifika nasaun povu nia dignidade.

Atu hatene kle’an Amu Martinho nia hanoin kona-ba prosesu hili Amu Bispu, bele akompaña entrevista husu no hatán ne’ebé jornalista Matadalan (MTD) hala’o ho Amu Martinho.

 MTD: Amu nia komentáriu kona-ba nomeiasaun Pe. Virgílio do Carmo da Silva sai Bispu Dioseze Dili?

Ha’u hanoin iha tinan extraordináriu ba misericordia. Sarani tomak hosi Dioseze Díli nian bele haksolok ona, tan hetan ona bispu foun. Atu sai bispu ida, la significa “karier” sa’e, maibé atu serbi.

Ha’u hakarak kaer lifuan tolu ne’ebé Papa Francisco ko’alia loron hirak ne’e -Profecia, Proximidade no Esperansa.

MTD: Signifika saida hosi liafuan tolu nee Amu?

Profecia katak oinsá maka bispu no padre sira hamutuk ho relijiozu/ relijioza hakotu lia atu “rona Maromak” hodi hala’o moris hamutuk ho sarani sira. Obediencia katak, hakruk hodi rona. Obediencia ne’e la’os simu taka matan. Iha nafatin discernimentu ka liafuan baibain “critica constructiva”.

Tuir mai liafuan “proximidade” katak ida ne’ebé besik liu. Bispu nia kolaboradór sira maka padre. Depois madre sira no katekista sira. Depois maka leigus kompetente. Sira fó liman ba malu atu tulun malu.

Iha tentasaun boot ne’ebé hanaran “il terrorismo del chiachere”,  katak, gosta liu ko’alia át ema iha kotuk no la brani atu halo krítika públika. Ita labele insulta ema nara-naran de’it. Maibé, furak liu ita ko’alia ho fuan no hanoin ho ulun. “Terrorismo del chiachere” ne’e hanesan character assassination ka gosip no halo isu. Nee halo mate ema de’it.

Ikus liu maka esperansa. Maske iha todan no susar nia laran ita keta lakon forsa interior ida atu hakat ba oin.

MTD: Prosesu atu hili Amu Bispu ne’e oinsá?

Prosesu ne’e naruk no susar tebes. Tinan-tinan Vatikanu observa amu-lulik sira maibé “sub secretum”, katak segredu. Laiha padre ida maka hatene nia sai kandidatu ka lae no laiha ema ida maka preparadu atu sai kandidatu. Maibé, padre hotu-hotu ne’ebé ordena ona, automatikamente nia iha ona naran iha Vatikanu depois maka iha komisaun ida ne’ebé hahú halo selesaun. Komisaun ida ne’e metin ona iha Vatikanu. Naran hirak ne’e haruka liu-hosi “votacao segredo absoluto”.

Vatikanu haruka karta votasaun segredu ne’e atu amu lulik ida-idak fó pareser ka hanoin/ opiniaun. Bainhira point pozitivu maka barak liu, nia maka sei hetan atensaun. To’o ikus mai hela naran 2-3 fó ba Papa. Liafuan ikus, Papa maka dehan ida ne’ebé maka sai bispu. Ne’eduni, laiha kampaña eleitorál. Laiha lei eleitorál ba bispu.

Klaru, iha mós background iha estudus maibé prátikamente bispu hotu la menus hosi “mestrado”, balun doutór. Pelumenus domina língua 2-3 hanesan ne’e. Labele tetun de’it. Mate fatin kedas. Sira ne’ebé estuda mós tenki hola iha estranjeiru—Itália, Portugal, Fransa, España no seluk tan. Mínimu tinan 35, no mínimu sai amu lulik tinan 5.

Iha istória Timor nian, só Don Carlos F.X. Belo maka “pecahkan record”. Foin maka tinan 3 sai amu lulik no tinan 34 de’it, sai ona administradór apostóliku. Ida ne’e kazu extraordináriu.

MTD: Iha mundu ne’e dehan Salezianu labele sai bispu. Karik ne’e tebes?

Salezianu labele sai bispu? Ne’e hanesan ko’alia halimar de’it. Relijiozu hotu-hotu ko’alia ida ne’e. Maibé, bainhira ema ida sai ona padre, nia automatikamente iha posibilidade atu sai bispu. La haree ba diosezanu ka relijiozu. Haree ba padre.

MTD: Problema saida maka tuir amu nia hanoin prioridade liu ba bispu foun iha dioseze Dili atu hadi’a iha nia mandatu?

Luta ba justisa no damen no integridade kriasaun. Don Virgílio nu’udar Salezianu nia iha ona ezemplu ida, Don Carlos Filipe. Liu-liu nu’udar Salezianu, nia tenki lori pedagojia Salezianu nian atu hametin liu eduksaun báziku—halo muturabu sira sai mututaba. Don Bosco nia karisma ba nu’udar aman no mestre ba foinsa’e sira. Timor-Leste agora ne’e presiza tebes edukasaun alma, fuan no neon.

MTD: Edukasaun báziku nia importánsia maka saida?

Hanorin lé, hakerek, no ko’alia. Ohin loron, ema to’o ona universidade mós lé la hun la dikin, hakerek ulun tun ain sa’e, ko’alia gagu maka barak. Igreja Katólika mós ninia edukasaun fraku. Maske iha Timor ne’e kualidade ás ona maibé ba rai liur ita nia mentál fraku liu. Ida-rua de’it maka tebe rai netik, maibé barak liu maka mout. (*)

Matadalan