Eis PM 2 Hatan Tribunal

DILI - Aban (2/2/2016) eis Primeiru Kay Rala Xanana Gusmao no Mari Alkatiri sei sai sasin hodi fo deklarasaun ba Tribunal Distrital Dili (TDD), ba kazu partisipasaun ekonomiu iha negosiu no administrasaun danoza neebe involve arguida Emilia Pires no Madalena Hanjam.

Tuir agenda neebe mak marka ona katak, aban (2/02) Tribunal sei kontinua rona deklarasaun husi sasin Xanana Gusmao no Mari Alkatiri neebe mak arola husi parte defesa Emilia Pires nian. Neebe iha parte dader tuku 9:00 tribunal sei rona deklarasaun husi sasin Mari Alkatiri no parte loraik tuku 2:30 sei rona hikas fali husi sasin Xanana Gusmao.

Tuir akuzasaun husi Ministeriu Publiku neebe lee sai iha tribunal katak, iha loron 9 Fevereiru 2011, arguida Madalena Soares haruka karta VMS/PM/11/50 ba Primeiru Ministru atu husu fundu adisional ida Ministeriu Saude ba alojamentu no alimentasaun mediku kubanu sira. (600,000 USD) unidade kardiolojia no hematolojia (400,000 USD) no kama ortopedika atus ida (100) (400.000 USD). Primeiru Ministru despaisa oinsa pedidu nee haruka ba Ministeriu Finansas.

Iha loron 6 Fevereiru 2011, liu husi ofisiu No. 203/GPM/II/2011, arguida Emilia Pires simu informasaun husi despaisu Primeiru Ministru nian. Iha loron 29 de Marsu 2011 arguida Emilia Pires liu husi ofisiu 104/GMF/III/2011 fo pareser kona-ba pedidu adisional orsamentu formula husi arguida Madalena Soares, fo hanoin atu aprova pedidu liu husi fundu rezerva kontinjensia.

Iha loron 29 de Marsu de 2011, liu husi ofisiu 0312/GPM/2011, Primeiru Ministru aprova kedas pedidu hamutuk USD 1.300.000,00, iha rejerva kontijensia nian atu selu alojamentu no alimentasaun mediku Cubanu sira nian, unidade sira kardiolojia no hematolojia no akizasaun kama ortopedika atus ida (100).

Mai fali iha loron 8 de Abril de 2011, arguida Emilia Pires fo hatene ba arguida Madalena Soares katak pedidu pagamentu liu husi rezerva kontijensia no despeza sira alojamentu no alimentasaun mediku kubanu sira, presiza ba unidade sira kardiolojia no hematolojia no sosa kama ortopedika atus ida (100), hamutuk USD 1.300.000,00, aprova tiha husi Primeiru Ministru no verba nee sei transfere kedas. Informsaun kompletu iha STL Jornal no STL Web, edisaun Tersa (2/2/2016). Domingas Gomes

Suara Timor Lorosae