Deklara ona Zika hanesan ameasa globál ba saúde públiku

Diretora-jerál OMS nian defende resposta kordenadu ida hasoru vírus, maibé, agora daudaun, laiha bandu ruma ba viajen no troka komersial sira entre nasaun sira ne'ebé zika mosu.

Vírus zika deklara ona hanesan emerjénsia globál ida, fó sai hosi Organizasaun Mundiál Saúde nian (OMS).

Diretora-jerál OMS nian, Margaret Chan, hatete ba jornalista sira, iha Jenebra, katak tenki iha resposta kordenadu ida ba ameasa ne'e maibé, agora daudaun, laiha bandu ruma ba viajen sira no ba troka komersiál sira ho nasaun sira ne'ebé vírus ne'e iha.

"Hafoin haree tiha prova sira, komité konsidera ona katak foku sira hosi mikrosefalia no komplikasaun neurolójiku sira konstitui iha faktu estraordináriu ida no ameasa ida ba saúde públiku ba parte sira seluk iha mundu. Tuir komité nia haree katak tenki iha resposta internasionál kordenadu ida hodi hamenus ameasa iha nasaun sira ne'ebé afetadu ona no hamenus risku hodi bele da'et iha nível internasionál".

Dezignasaun hosi emerjénsia globál rekomenda ona, iha loron-segunda ne'e, hosi komité pertu independente sira hosi organizasuan ONU nian.

Alerta hanesan maka'as. Maski tenki iha prova ba ligasaun entre vírus ho aumentu ba kazu mikrosefalia sira nian iha kosok-oan sira, Margaret Chan hatete katak iha kazu sira ne'ebé koñesidu ona iha tinan rua liubá.

"Membru sira hosi komité konkorda ona katak kazu hatudu situasaun emerjénsia internasionál ida iha saúde públiku. Ha'u konkorda ba konsellu ne'e no ha'u agora deklara katak foku foun sira hosi mikrosefalia no anomalia neurolójiku sira seluk ne'ebé mosu iha Amérika Latina, hanesan ho sira ne'ebé mosu ona iha 2014 iha Polinézia Franseza konstitui iha emerjénsia saúde públiku ida iha nível internasionál", afirma hosi diretora-jerál OMS nian.

Desizaun hodi konsidera katak vírus Zika hanesan ameasa ida ba saúde públiku mundiál sei tulun hodi aselera resposta sira ba moras ne'e no insentiva investigasaun.

Iha semana liubá, OMS alerta ona katak zika aumenta "maka'as" no bele infeta ema millaun haat iha kontinente amerikanu. Brazil hanesan nasaun ne'ebé afetadu liu. Prezidente Dilma Rousseff deklara ona funu hasoru susuk ne'ebé responsável ba transmisaun vírus nian.

Iha suspeitu katak zika, bainhira feto isin-rua sira hetan, bele hamosu mikrosefalia iha kosok-oan sira, formasaun ladi'ak iha kakutak ne'ebé bele hamosu defisiénsia mentál sira no mós kosok-oan sira bele mate.

Preokupasaun sira ho zika aumenta ona iha tinan liubá, hafoin Ministériu Saúde Brazil nian hahú investiga karik iha aumentu ba kazu sira mikrosefalia nian iha nasaun ne'ebé mosu hosi transmisaun vírus nian durante períudu jestasaun.

Boletín ida fó sai iha semana liubá hosi Ministériu Saúde Brazil nian konfirma ona katak labarik na'in 270 moris ona ho mikrosefalia ho infesaun konjénitu, maibé ne'e la signifika katak problema mosu hosi vírus ne'e. Sei hala'o hela investigasaun sira ba kazu suspeitu hamutuk 3.448 resin.

Hanesan ba dala haat maka OMS deklara emerjénsia globál. Ba dala ikus maka akontese iha tinan rua liubá tanba epidemia Ébola.

SAPO TL ho Renascença – Foto: EPA@ Marcelo Sayao