Pe. Virgilio Do Carmo da Silva, SDB, “Hau Sai Bispu Hodi Servi Kreda no Povu Tomak”

DIOSEZE Dili iha Sabadu (30/1/2016) tuku 20:00 Otl, liu husi konferensia imprensa neebe halao iha Kámara Episkopál Dioseze Díli, Lecidere, anúnsia bispu foun ba Dioseze Díli. Konferensia imprensa neebe diriji husi Encaregadu de Negociais da Nunciatura Apostoliku ba Timor Leste, Ionut Paul Strejac hatete katak santu Padre Papa Francisco hili ona Pe. Virgilio do Carmo da Silva, SDB sai Bispu Dioseze Dili, hodi troka Bispu Alberto Ricardo da Silva neebe Aman Maromak bolu hikas ba Nia kadunan Santo, 2 Marsu 2015.

Amu Virgilio Do Carmo da Silva, SDB, atual Provinsial Timor Leste-Indonesia, moris iha Venilale, 27 Novembru 1967, oan husi Jose Do Carmo da Silva no Isabel da Silva. Nia oan daruak  husi  maun alin nain nen (6). Oan dahuluk mak Manuel Joselino Do Carmo da Silva, oan datoluk mak  Jose L.C. da Silva, oan dahaat mak Gualdino do Carmo, oan dalimak mak Pe. Gui Do Carmo da Silva, SDB no oan ba danen mak  Nilton Do Carmo da Silva.

Bispu eleitu Virgilio hateten Amu Papa Francisco depois halo sakrementu kona ba konsulta neebe halo ba nia sai Bispu Dili, nia simu tiha informasaun ida nee, nia dehan se ida nee maka maromak nia hakarak, nia sei halo tuir Maromak nia hakarak.

Hau sai Bispu hodi servi kreda no povu tomak, hau laos sai Bispu ba hau nia aan rasik, knaar ida nee fo mai hau, tan nee hau presiza aprende barak, aprende oinsa bele sai bibi atan neebe diak, needuni Amu lulik no sarani doben sira, imi maka sei hanorin hau sai bibiatan neebe diak, imi hili ona hau, agora tulun hau sai bibiatan iha sarani sira nia putar oin, sertamerta loro- loron hau sei reza ba ita boot sira, nudar Bispu hau mos ho haraik aan husu ba sarani no amu sira reza mai hau, tamba vokasaun ida nee mai hau foun no laos fasil,” katak Amo Virgilio.

Amu Virgilio remata nia estudu iha eskola Salesiana, Fatumaka, no tama kedas ba Sociedade Salesiana Dom Bosco nian no halo nia profissão ba dala uluk iha loron 31 fulan Maio tinan 1990. Tuir kedas, iha tinan 1990 to tinan 1998, husi nia congregação haruka nia ba halao nia estudo filosofia no teologia iha Manila. Informsaun kompletu iha STL Jornal no STL Web, edisaun Tersa (2/2/2016). Joao Anibal/Mikael Mau

Suara Timor Loeosae