SIK Kaer Trafikantes Nain Hat

Komandante Servisu Investigasaun Krimina (SIK), Inspektor Xefe Ludgerio Lay, hateten durante tinan 2015 servisu investigasaun kriminal konsege kaer trafikante nain hat ne’ebe involve iha kazu trafiku humanu.

Komandante Lay, hateten husi trafikante nain hat ne’e rua husi rai laran no rua seluk ema estrangeiru, sira lori labarik ho idade menoridade ba halo aktu prostituisaun.

“Trafikante sira ne’e rekruta ema husi liur mai servisu iha ne’e ho vista turista, depois sira hatama labarik sira ne’e ba servisu ne’ebe mak la loos,” Komandante Lay hateten, iha Dili.

Tanba benefisiu ne’e, nia dehan, la’os ba labarik sira ne’ebe halo vida prostitute, maibe ba fali trafikantes, e attitude ida ne’e viola ona lei protesaun ba labarik.

“Ne’e tenke prosesa sira tuir lei ne’ebe mak vigor ona,” nia hateten.

Nia hateten, hafoin kaptura trafikantes, vitima sira ne’e polisia entrega fila fali ba familia no balun hatama iha uma mahon hodi rekopera sira nia psikologia.

Iha parte seluk Deputadu Eladio Faculto, hateten trafikante sira ne’e prejudika ona labarik nia moris no vida, tanba ne’e presiza prosesa tuir lei no justisa.

“Sekuandu ita husik ema sira ne’e livre, ne’e ita fo tan kbi’it ba sira atu organiza diak liu tan,” Faculto hateten.

Nia dehan, aktu hanesan ne’e iha posibilidade bo’ot atu buras iha rai laran, tanba ne’e husu ba polisia atu kontinua buka no kontrola iha sosiadade nia le’et ba atividade hanesan ne’e.

Iha parte seluk komunidade Maria Trindade, husu ba governu liu husi Sekretariadu Estadu Apoiu Sosia Ekonomiu da Mulher (SEM) atu sosializa asuntu ida ne’e ba komunidade, nune’e sira mos iha konesementu.

“Ita tenke hatene,  kuandu mai ema sira ne’e nia hahalok no jeitu ne’e hanusa, komunidade tenke hatene atu nune’e labele monu ba lasu,” nia sujere.

The Dili Weekly