ASSANAMI: OPOZISAUN LABELE LAKON

DILI - Sekretáriu Jerál Partidu Demokrátiku (PD), Mariano Assanami Sabino, senti tristi tanba ohin loron Partidu FRETILIN la halo ninia kna’ar hanesan opozisaun iha Parlamentu Nasionál. Tuir loloos, interese nasionál la’ós  atu halakon opozisaun.

“Interese nasionál ita hamutuk, maibé opozisaun ne’e parte ida atu halo para krítika ba dezenvolvimentu, krítiku ba osan estadu nian no halo krítika ba buat oi-oin,” Assanami dehan ba jornalista sira sira iha edifísiu jornál Independente, Hudi-Laran, Sesta (08/04).

Iha kontestu ukun, eis ativista rezisténsia iha diaspora ne’e esplika katak prinsípiu PD nian iha buat rua ne’ebé kaduak. Ida maka ba governante ne’ebé maka boot liu. Ida seluk maka ba opozisaun. Rua ne’e boot liu maske nia funsaun keta-ketak, maibé sira na’in rua maun alin.

Iha biban ne’e, nia hatete  Bloku Governu Koligasaun (BGK) labele rahun, tanba haree ba akordu ne’ebé maka partidu tolu hanesan Partidu Congresso Nacional da Reconstrução de Timor (CNRT), Partidu Demokrátiku (PD) no Frenti-Mudança (FM) sei ukun to’o 2017.

“Akordu ne’e maka atu dehan kesi malu atu ukun ne’e to’o 2017. Programa ho planu ne’ebé maka iha katak sé iha buat ne’ebé maka ladi’ak iha dalan, diálogu para ita atu ko’alia ba malu,” Assanami dehan ba jornalista sira iha edifísiu jornál Independente, Hudi-Laran, Sesta (08/04).

Nia hatutan kuandu iha funu laran sempre iha krítika no auto krítika. Sé sala halo auto krítika atu la’o ba oin. Labele dehan laiha sala. PD sempre fó apoiu ba aprovasaun orsamentu no planu governu hatudu momoos iha Parlamentu Nasionál (PN)—nunka kontra orsamentu no planu governu. Purke, iha buat tolu maka hamonu governu. Ida maka labele halo mosaun sensura ba governu, ida fali maka sé la aprova planu no programa governu  no ida fali tan maka vota kontra ba orsamentu jerál estadu.

“Sé taka ona dalan ba PD, ne’e laiha buat ida. Maibé, ita husu ona diálogu no fiar katak partidu modernu ne’ebé partidu ida boot lidera hosi maun boot Kay-Rala Xanana Gusmão nian odamatan nunka atu taka. Odamatan diálogu sempre iha. Maibé, ami PD la ezije,” Assanami haktuir.

Tuir Sekretáriu Jerál Partidu Demokrátiku ne’e katak partidu iha hanoin ida katak bainhira prezidente partidu Fernando La-Sama de Araújo laiha, ne’e presiza apriende lisaun ne’ebé maka La-Sama husik hela. Ba estadu, PD sempre hakruk, tanba interese estadu  boot liu partidu nian.

Nia haktuir katak La-Sama uluk prezidente interinu, nia (La-Sama) hakotu problema ne’ebé maka iha halo operasaun ba Ermera, Maliana no Covalima. Iha Ermera votante iha 9 mil tún ba 3 mil, iha Bobonaro iha 7 mil tún ba 5 mil. La-Sama sakrifika PD nian ba iha situasaun. Tanba ne’e maka bainhira La-Sama laiha ona, PD nafatin ho lisaun ida ne’e.(gus)

Timor Post